Kalaallit meerartaat DK-imi aviisi aqqutigalugu tapersersortissarsiortut

Peqatigiiffik Kalaallit Meerartaat ”Foreningen Grønlandske Børn” ullumimiit aallartittumik suliniummik Juullip Inualiisussarsiorput. Suliniut aviisit Politiken Sermitsiaq-lu aqqutigalugit ingerlanneqarpoq. Siunertaavoq inuinnarnit aningaasanik tapersersortissarsiorneq.

Juullip Inua Kalaallit Nunaanni aputitarasaartumiittoq inuup tapersersuiniartup aqqanik allassimasulik assitaliullugu nittartakkani takuneqarsinnaavoq.

Assersuutigalugu aviisip Politiken-ip nittartagaa ammaraanni, assitaq qernertuinnaq tooraanni saqqummissapput paasissutissat Kalaallit Nunaanni Naatsorsueqqissaartarfimmeersut, assersuutigalugu angutit 9 procentii 25-inik ukioqalernatilluunniit imminornikkut, ajunaarnikkut allatigulluunniit toqusarput.

Nipi tunuliaqutaasoq tassaavoq sianaalaarpalaaq immiaaqqallu puuisa kallussaappalunnerat. Assitaq tooraanni Peqatigiiffiup Kalaallit Meerartaasa nittartagaanut asseq nuussaaq, tassanilu kinaluunniit 50 koruuniniit 10.000 koruuninik ataasiarluni qaammatikkaartumilluunniit tapiisinnaasoq allassimassalluni.

-Nuannaralugu juullip inua Kalaallit Nunaannut attuumassuteqarmat assitaliupparput, nalunnginnatsilu sunaluunniit illuatungeqartoq, peqatigiiffik sinnerlugu Lars Roskam Hemmingsen oqarpoq.

- Allanarmat eqqumiiginarsinnaagaluartoq neriuppugut tapersersorteqarnerulerumaarluta, oqarpoq.

Suliniut sapaatip-akunnerini pingasuni sisamaniluunniit ingerlanneqassaaq, apeqqutaalluni qanoq ilutsitsitigineq.