Kalaallit marluk sisoraatinik VM-qataassapput

Nunarsuarmi sisoraatinik pissartanngorniuunnerit Italiami ingerlanneqartussat aqagu arfininngornermi aallartissapput februaarip 13-iata tungaanut ingerlanneqassallutik.

Nunatsiniillu sisoraatinik VM-imut peqataasussat marluupput, tassa 27-inik ukiulik Krister Støvlbæk aamma 22-inik ukiulik Akannguaq Lennert. Marluullutik dansket sisorartartut kattuffiata nunanut allanut unammisartuinut ilaallutik unammeqataassapput. Nunatsinni sisorartartut kattuffiata akuerisaasumik nunat tamalaat unammersuarnerinut peqataatitaqarsinnaanngineratigut nunatsinneersut dansket kattuffiat aqqutigalugu unammeqataassapput.

Akannguaq Lennert aamma Krister Støvlbæk Team Grønlandimit aningaasaliiffigeqartut, sangusaarnermi sangussapiloornermilu unammeqataassapput.

Sisoraatinik VM-mi matumani Krister Støvlbæk naggataassaaq. Ukiuni arfineq pingasuni nunarput sinnerlugu nunani allani unammisartuunerminit Støvlbæk nammineerluni tunuarniuteqarsimavoq. Støvlbæk-ip naggataamik VM-meqataanermini siornaak 2003-mi sangusaapiloornermi unammeqataaqqaarluni angusarisimasani pitsanngoriartinniarniarpai. Taamani Krister Støvlbæk nummer 56-ivoq.