Kalaallit maluginiarneqaraluttuinnarput
Nive Nielsen atuagassiami ilisaritinneqassaaq, Arctic Spirits, Sume-kkut aamma Nanook-kkut apersorneqarneri aamma allaaserineqassallutik. Normu sisamanngorpat saqqummersussaq immikkut sammisaqarfiuvoq.
Atuagassiami Nive Nielsenip oqaluttuarissavaa nipilersortarnini erinarsortarninilu qanoq aallartissimanersoq, Canadamimigooq nammineq najugaqarnermi nalaani aliikkutassaqarniassagami angutaatimi guitarimik mikisunnguamik aappaluttumik tunivaani.
- Taamaallunga erinniortalerpunga. Uannut tamanna eqqumeeqaaq, ittoorutigisorujussuuaralu. Angutaatiga guitariutigalunga siullerpaamik erinarsorfigissagakku allatut ajornartumik tunullugu taamaaliortariaqarpunga, qullerlu aamma qamittariaqarlugu, Nive Nielsen Koda/DK-mut oqaluttuarpoq.
Per Berthelsenip aamma eqqaamaqqissaarpaa, Sume kollegiami nammineq ineeqqamini nipilersortarlutik qanoq aallartissimanersut, namminermigooq tusaaleriasaarpaa nipilersuut allatorujussuaq ittoq atorneqartoq. Sunaaffa Malik Høegh nammineq ineeqqamini nipilersorujoortoq. Tassalu Kalaallit Nunaanni rockimik erinarsortartut annersariligassaat nuannarineqarnersaallu taama aallartipput.
Kalaallit cd-nik tuniniaasarnerat qallunaat tuniniaasarnerannut Koda/DK-p assersuuppaa. CD-nik tuusintilinnik arlalinnik tunisaqarsimagaanni, tamannami Kalaallit Nunaanni nalinginnaavoq, assigiinnassavaa Danmarkimi sisamanik-/tallimanik platininnanneq, atuagassiaq erseqqissaavoq.
Koda/DK kalaallit qallunaallu nipilersortartut pisinnaatitaaffiinut isumaginnittartup, Koda-p, saqqummersittarpaa. Atuagassiaq ilaasortanut sisamanngorpat nassiunneqassaaq, aamma nittartakkami koda.dk-mi ullormi tassanngaanniit atuarneqarsinnaalissalluni.
