Kalaallit Københavnimiittut suliffissaqartinniarneqarput

Kalaallit Københavnimi najugallit 20-t missaanniittut ullumi akunnialuit atorlugit suliffissanik neqeroorfiginninnissaq pillugu suliniut ”Qaami”-mik qulequtserneqarsimasoq tusarniaavigaat.

Ippassaq radio aviisimi oqaluttuarparput, EU-p inunnik ikiuiniarluni aningaasaateqarfiata suliniut taanna 2 mio. koruunit missaanni aningaasaliissuteqarfigisimagaa.

Kalaallit 20-t takkuttut akornanni aqqanillit maanna pikkorissarnissamut allatsissimapput, pikkorissarnissarlu taanna marsip arfernaniit juunip naanissaata tungaanut ingerlanneqassaaq. Isumaavortaaq pikkorissartut qaammatini marlunni danskit suliffeqarfiisa ilaanni misiliutaasumik sulisinneqassasut.

Suliniummut Qaamimut suliniuteqartuupput, peqatigiiffik INUIT, Kalaallit illuutaat Københavnimiittoq aammalu siunnersortitut suliffik Akademos.

Suliniummut aqutsisuusoq Klaus Ebbesen oqarpoq, pikkorissarnerup ingerlarnga inuiaqatigiilerinermi ilisimatusarnermut aamma paasiniaaqqissaarnertut atorneqarsinnaassasoq, taamalu tamanna kalaallit danskillu københavnimi inooqatigiinnerisa naligiissinniarnerinut ersersitsisuuniarumaarluni.