Kalaallit Københavnimiittut danskinut akulerunnissaat anguniarneqalersoq
Kalaallit Københavnimiittut danskinut akulerunnerunissaat anguniarneqalerpoq.
Nunasisut akulerunnerulersinniarlugit siunnersuisooqatigiinnik marsip arfineq-aappaanni qinersineqassaaq. Kalaallinilli tamanna ilisimaneqarpianngilaq, kalaallit Københavnimiittut naniuminaannerat pissutaalluni.
Kalaallit Københavnimi najugallit qarasaasiaq atorlugu nassaariuminaatsippagut, kommunimi qarasaasialerisut pisortaat Michael Sønderstrup taama oqarpoq.
Københavnimi innuttaasut ilaat 55.000-t missaanniittut nunasisut akulerunnerulersinniarlugit siunnersuisooqatigiivinut sinniisissamik taasisinnaatitaasut tamaasa nassaarinissaat tassunga suliakkiutigineqarpoq.
- Inuup normua atorlugu taasisinnaasut qarasaasiami takuneqarsinnaasarput. Kalaallilli taasisinnaasut nassaariuminaatsorujussuusarput. Naalagaaffiup avataaniit nunasisut suminngaanneerneri qarasaasiami erngerlugit nassaarisinnaasarpagut. Kalaallilli inuuiisa normui atorlugit ujaraangatsigit inunngorfigisaatigut aatsaat paasisarpagut Danmarkimut nunasisuusut, Michael Sønderstrup oqarpoq.
Taassuma ilisimatitsissutigaa allakkat 1400-t missaanniittut Københavnimi najugalinnut kalaaliugunartunut nassiussuunneqarsimasut.
- Københavnimi Kalaallit Illuannit nalunaarutigineqarpoq kalaallit 3000-t missaaniittut Københavnimi najugaqartut. Taamaalilluta eqqoriarsinnaalluarparput ikinnerpaamik 1000-t sinnerlugit nunasisut akulerunnerulersinniarlugit siunnersuisooqatigiinnut qinersinnissartik allagarsissutigisimassanngikkaat, Michael Sønderstrup oqarpoq.
Kalaallit Københavnimi najugallit qinersinissaq pillugu allagarsisimanngitsut kommunimut saaffiginnissinnaapput imaluunniit aviisini allagartaliussani allassimasut malillugit qinersinissaq pillugu ataatsimiititsinernut ataatsimiigiarsinnaallutik. Ullormi qinersivimmi qinersiartuutigaluni kommunimi innuttaalluni aamma allatsittoqarsinnaavoq.
