Kalaallit Københavnimi unnugu isiginnaartitsillutillu nipilersulersut

Kalaallit Illuutaanni Københavnimiittumi pingajussaannik unnugu kulturikkut unnussiuaaqatigiittoqalerpat isiginnaartitsisartunngorniaq Vivi Sørensen aamma erinarsortartoq Nive Nielsen peqataassapput.
Vivi Sørensen Assi © : Simon Uldum
novembarip 25-at 2014 07:54

Kulturikkut unnussiuaaqatigiinnermi nipilersorneq eqqumiitsuliallu ullutsinneersut Nunatsinnut attuumassuteqartut sammineqartarput.

Vivi Sørensen isiginnaartitsisartunngorniarluni Odensemi maanna ilinniartuusoq, kulturikkut unnussiuaaqatigiinnermi qallunaat kalaallillu akunnerminni ileqquliutiinnarsimasaat pillugit kisimiilluni isiginnaartitsissaaq.

Isiginnaartitsinermik ilitsersuisartoq Hanne Trap Friis unnugu aamma peqataanermini, isiginnaartitsissut Sarfartuut/Strømsteder suleqataaffigalugu angalanermini misigisaminik oqaluttuassaaq.

Erinarsortartoq Nive Nielsen kitaarerluni kisimiilluni erinarsussaaq.

Assilialiorluni qalipaasartup Buuti Pedersenip Kalaallit Illuutaanni maanna saqqummersitai, pinngortitamit Nunatsinneersunik Danmarkimeersunillu angisuumik qalipakkat kulturikkut unnussiornermi aamma takuneqarsinnaassapput.