Kalaallit kusanartuliaat kunngikkormiumit tapersersorneqarput

Saqqummersitsisarfik ”Nordenvind” pulaareerlugu, nunatsinni eqqumiitsulianut katersugaasiveqalernissaq prins Henrik-mit taperserneqarpoq.

Eqqumiitsuliortut aqqaneq-marluk, taakkunannga Bolatta Silis-Høegh, Bodil Kaalund-ilu peqataasoralugit saqqummersitsisoqarpoq, Hans Lyngellu uillarnera Inge Lynge aamma najuuppoq.

Eqqumiitsuliat nunatsinneersut nalunaaquttap akunnerani ilivitsumi umerualaarpaat,

nunattalu eqqumiitsulianik katersugaasiveqalernissaata tapersersornera prins Henriup qularutigeqqunngilaa.

-Piffissanngorpoq kalaallit eqqumiitsuliaminnik katersugaasiveqalerpata. 1700-kkunnili nunarsuarmiunit ilisimaneqalermata avataanit katersat utertillugit katersortariaqalerput.

Pikkorissunimmi sanaajupput, prins Henrik unnersiorpoq.

Nunatsinni eqqumiitsulianik katersugaasiveqalernissaa kunngikkormiunit taperserneqarnera tupaallaatissaanngilaq, prins Henrimmi ukiut 40-ngajaat matuma siornali Danmark-imut nuukkami kalaallit eqqumiitsuliaannik katersilersimavoq.

-1970-ikkunnili siullermeerlunga Kalaallit Nunaanniikkama kalaallit eqqumiitsuliaat tiguartiffigaakka, taamanimiillumi katersugarilerlugit.

Franskit 1600-ikkunni, 1700-kkunni 1800-kunni, minnerunngitsumillu Paul-Emile Victorip ilisimasassarsiorluni katersai puigorneqassanngillat, prins Henrik nuannaarpaloqisoq naggasiivoq.

Danskit franskillu Kalaallit Nunaannut soqutiginninnerisa ingerlaannarnissaa prins Henriup aamma neriuutigaa.