Kalaallit kissaataat Løkkemut saqqummiunneqarput

Danskit naalagaaffiat aningaasaateqarfimmut, kalaallit nunaanni aatsitassarsiortunut attaveqarnermullu iluaqutaasussamut, aningaasaliisariaqarpoq.
Assi © : Maasi Pedersen/KNR
juunip 29-at 2015 11:54

Aningaasaliisartut allat aamma aningaasaliiniassammata taamaaliortariaqarput.

Folketingimi ilaasortat kalaallit ataatsimoorlutik danskit naalakkersuisussaannut taama kissaateqarput.

Siumut Inuit Ataqatigiillu aalajangiisuussagaluarunik isumaqarput, danskit naalakkersuisui Kalaallit Nunannut iluaqutaasussamik aningaasaateqarfimmut aningaasaliinissamut salliusariaqartut.

Aamma atuaruk Aajap naalakkersuisut eqqaaseqqinniarpai

Partiit marluullutik Lars Løkke Rasmussenip sapaatip akunnerata siuliani ataatsimeeqatiginerani tamanna kissaatigalugu erseqqissarpaat - Aleqa Hammondip ima oqaloqatigiinnertik oqaluttuaraa:

- Qallunaat naalagaaffiata Kalaallit Nunaannut ineriartortitsinermut, aatsitassarsiornermut sanaartugassanullu angisuunut aningaasaliinerunissaa aqqutissarsiuunneqassasoq kissaatigaarput, Aleqa Hammond oqarpoq.   

Maanakkuugallartumummi suliffeqarfiit namminersortut danskillu utoqqalinersialinnut aningaasaateqarfiisa Kalaallit Nunaanni suliffissuit inerisarnissaat anguniarlugu aningaasaateqarfiliornissamut kisiartaallutik soqutiginnipput.
Maannamullu suli aningaaasaateqarfiliortoqanngilaq.

 

Aamma atuaruk Ikinnerussuteqartut sunniuteqarnerunermik kinguneqassaaq


Isumassarsiamullu Thorningip naalakkersuisui isumaqataagaluarlutik aningaasaateqarfimmut nalagaaffiup aningaasaliinissaanut piareersimasimanngillat.
Suliffeqarfiit namminersortut malinnaassappata naalakkersuisut peqataanissaat pisariaqartoq Aleqa Hammond isumaqarpoq.
- Naalagaaffik tunuarsimaassappat aningaasaateqarfissuit qarmarniassallugit naammanngilaq, naalagaaffik tunuarsimaanngippat aamma aningaasaliiumasunut sunniuteqartarpoq, taanna suleqataaffigerusupparput, Aleqa Hammond oqarpoq.
Inuit Ataqatigiinneersup Aaja Chemnitz Larsenip Løkkemut oqaatigaa, danskit naalagaaffiata ikiorsiinissaa, Kalaallit Nunaanniit politikkikkut kissaataasoq:
- Nunani allaneersut aningaasaliinissaannut qulakkeerinnittussamik iliuuseqarnissamut pisariaqarmat. Assersuutigalugu aningaasaateqarfissamik pilersitsinissami, inatsisartuni partiit arlaqartut tapersersugaanni, pilersinneqarnissaanut danskit naalagaaffiat soorunami tapersiisariaqarmat, Aaja Chemnitz Larsen oqarpoq.