Kalaallit kisimik isornartorsiuinngillat
- Oqaluuserisassanik ulikkaassagaluarpoq, Folketingimi Nunarput pillugu oqaseqartartut arlalit taama oqaaseqarput.
Socialdemokratit Nunarput pillugu oqaaseqartartuat, Mogens Jensen, oqarpoq:
Uangami aamma tamanna tupigusuutigaara. Issittumi siuttut Kalaallit Nunaannut pingaaruteqartussamik ataatsimeeqqammerput, uuliamik nassaartoqarneratigut periarfissarpassuit nuioralerput. Kisianni Kalaallit Nunaat eqqaannginnamiuk imminut illersorniarunarpoq, tassami Issttumi siuttut ataatsimiinnerat, Lene Espersenip peqataaffiginngisaa, sammisariaqarsimassagaluaramiuk, socialdemokratit Nunarput pillugu oqaaseqartartuat, Mogens Jensen oqarpoq.
Det Radikale Venstrenit Nunarput pillugu oqaaseqartartup, Niels Helveg Petersenip, ministeriuneq isornartorsiorpaa:
- Oqalugiaammi Kalaallit Nunaannut tunngasunik immikkoortoqanngimmat tupigusuppunga. Tamanna ajorpoq. Kalaallit Nunaani eqqaanilu pisoqaqaaq, tamakkualu oqaaseqarfigissallugit pissusissamisooraluarpoq, Radikale Venstret Nunarput pillugu oqaaseqartartuat Niels Helvig Petersen oqarpoq.
SFip Nunarput pillugu oqaaseqartartua Kristen Touborg-i tupigusuttunut ilanngulluni oqarpoq:
- Statsministerip Kalaallit Nunaat taanngigajammagu aamma uanga tupigusuppunga. Namminersorneq pillugu Ataatsimiititaliarsuaqareersoq, aammalumi Kalaallit Nunaani ineriartornersuaqareertoq, tupaallannarpoq. Kalaallit Nunaata maanna inissisimanera oqaaseqatigiinnik ataasinnnguanilluunnit quppernerulluunnit affaanik samminngimmagu, SF-ip Kalaallit Nunaat pillugu oqaaseqartartua, Kristen Touborg, oqarpoq.
Venstrelli Nunarput pillugu oqaaseqartartuata Flemming Møllerip Nunarput eqqaaneqannginnera ajorisassaasorinngilaa. Akerlianilli:
- Kalaallit Nunaat pillugu oqaaseqarpiannginnera uanga nalilerpara, statsministeri isumaqartoq, Kalaallit Nunaanni pissutsit ajunngitsuusut. Tassami namminersorneq nalliuttorsiutigineqareerpoq. Aatsitassarsiornerlu aallartinneqareerpoq ilaallu ilanngullugit. Tassa suut tamarmik pissusissamisoorput, Venstrep Kalaallit Nunaat pillugu oqaaseqartartua, Flemming Møller oqarpoq.
Nunatta eqqaaneqannginnera sumilluunniit peqquteqaraluarpat, ileqqoq pitsaasoq malinneqanngitsoq, Christiansborgimi politikerit misilittagartuut marluk isumaqarput:
- Folketingimik ammaanermi oqaluagiaatit tusarnaarsimasakka immaqa tamarmik Kalaallit Nunaannut tunngasumik immikkoortortaqartarput. Aammami tamanna pissusissamisoorluinnarpoq, Radikale Venstreneersoq, Niels Helveg Petersen, oqarpoq. SF-imeersup Kristen Touborgip taanna isumaqatigaa:
- Folketingimi ukiuni 16-ini ilaasortaavunga, kisianni ammaanermi oqalugiaammi Kalaallit Nunaat taaneqanngitsoortillugu eqqamanngilara, Kristen Touborg oqarpoq.
