Kalaallit kinguaavisa Danmarkimi inuuniarnerat
Kalaallit Danmarkimiittut kinguaavisa Danmarkimi inuuniarnerat, Danmarkimi nunasisut kinguaavinut sanilliullugu ajornakusoorneroqisoq Kalaallit Illuata Odensemiittup nalunaarusiaanni atuarneqarsinnaavoq. Nalunaarusiaq ullumi saqqummersinneqarpoq.
Assersuutigalugu kalaallit Danmarkimiittut kinguaavisa aningaasanik ikiorneqarnerat, Danmarkimi nunasisimasut kinguaavinut naleqqiullugu marloriaataa sinnerlugu amerlanerupput.
Kalaallit Odensemi illuata forstanderiat, Kirsten Mærsk tamanna tupaallaatigalugu oqarpoq:
- Tupigusuutigeqaara kalaallit kinguaavi nunatsinniittut taama atugarliortigimmata. Ilami angajoqqaajusuni ataaseq danskiummat. Taanna tunuliaqutaralugu isumaqarnassagaluaramimi nunasisimasut kinguaavinut naleqqiullugu atugarissaarnerussaagaluartut, Odensemi Kalaallit Illuanni forstanderi Kirsten Mærsk, Danmarks Radiop Fynimi tusagassiortuannut, Finn Bønnelykkemut oqarpoq.
Kirsten Mærsk isumaqarpoq kalaallit Danmarkiliartinnatik qallunaatut ilikkarluarsimasariaqartut.
- Suliffissaqarniaraannimi tamanna pingaaruteqarluinnarpoq, Kirsten Mærsk tunngavilersorpoq.
