Kalaallit Kinamut ilaasariaqarsoraat
Sara Olsvig oqarpoq, pisuni taamaattuni ministeriunerup oqaasissani mianersuuttariaqarai, eqqaamasariaqaraalu Nunarput oqaluuserineqassatillugu Nunatta peqataanissaa pisariaqarluinnarmat.
Taanna aamma oqarpoq, pisuni taamaattuni Danmarkip Nunattalu akornanni tunngaviusumik tatigeqatigiinnerup ineriartortinnissaanut piumassuseqarneq misilinneqartartoq.
- Nunat allat siuttui Nunatsinnut tikeraaraangata, qallunaat oqartussaasui peqataagajuttarput, Sara Olsvig nutaarsiassaqartitsivimmut Ritzauimut qarasaasiakkut allappoq.
Siumup siulittaasuata Aleqa Hammondip Sara Olsvig isumaqatigaa. Taanna oqarpoq, Nunarput oqaluuserineqassatillugu, Danmarkimi naalakkersuisut Namminersorlutik Oqartussaneersunik qaaqqusisarnissaat pissuserissaarnerussagaluartoq.
Ministeriunerup Kinamut angalaqatissaasa allattorsimaffiat suli piareerneqanngilaq, kalaallillu peqataatitaqarnissaat suli nalunaarutigineqarani. Kinamut tikeraarnissaq ataasinngorpamiit tallimanngornerup tungaanut pissaaq.