Kalaallit Kinami atisanik takutitsisut

Atisanik takutitsineq Aatsitassarsiornermut Naalakkersuisup Jens-Erik Kirkegaardip Kinami angalaneranut atatinneqarpoq.

Kinamiut tusagassiortut 40-t takutitsinermut peqataaniarlutik nalunaarsimapput, puisip amianillu atisaliat nutaat Kinamiunit takutissorneqarmata, Kinami suliffeqarfiutilinnit tusagassiorfinneersunillu assorsuaq nuannarineqarput.

Kinami atisanik nioqquteqartartut siorna attavigineqarsimapput, taamani aatsitassanut naalakkersuisuusup Ove Karl Berthelsenip Kinamut tikeraarneranut atasumik.

Tamatuma kinguneraa kinamiup atisanik ilusilersukkanik allaaserinnartartup Xu Fengli'p - internetikkut ullorsiummini millionit sinnerlugit nuannarinnitsillip - Nunatsinnut ukiaq manna tikeraarnera. Ilagisimavaa assiliisartoq Peter Chang, marluullutillu maanna assilisaanik qaammatini aggersuni Fengli'p blog-iani saqqummiisaqattaassapput.

Aammattaaq Kinami atisanik allaaserinnittartut annerpaat marluk saqqummiussissamaarput, kalaallit atisaliaat pillugit aammali Kalaallit Nunaat takornariarfittut.

-Kalaallit Nunaata immikkut ittunik misigisaqarfiusinnaanera, pinngortitap minguinnera nerisassioriaaserlu pissanganartoq nalunanngittumik kinamiut amerlasuut nuannaringaat, Jens-Erik Kierkegaard oqarpoq.

Visit Greenlandip misissuinerata takutippaa ukioq manna kinamiut 400 Ilulissanut takornariarsimasut.