Kalaallit kinaassusiannut nunaqarfiit pingaaruteqarput

Inuiattut kinaassuserput oqallisigineqartillugu nunaqarfiit paarinissaat pingaaruteqarpoq, sapaatip akunnerata naanerani nunaqarfiit pillugit isumasioqatigiinneq ammarlugu, nunaqarfiit peqatigiiffianni siulittaasoq oqarpoq.
Allattoq Elisa Isaksen
septembarip 16-at 2013 07:41

Nunaqarfiit siunissaat pillugit Nuummi sapaatip akunnerata naanerani isumasioqatigiinneq, nunaqarfiit peqatigiiffiata siulittaasuata Jens Kristian Therkelsenip ippassaq ammarpaa. Taassuma ammaanermini nunaqarfiit kalaallit kulturiannut pingaaruteqarnerat erseqqissarpaa.

- Inooriaasitoqaq aamma qangaaniilli pingaartitat, illoqarfinni qaqutiguulersut, nunaqarfinni suli atuupput. Kalaallit oqaasii nunaqarfinni nukittupput ineriartorlutillu. Nunaqarfinni imminut ilisarisimavugut immitsinnullu paaraluta. Taamaattumik inuiattut kinaassuserput oqallisigineqartillugu nunaqarfiit paarinissaat pingaaruteqarpoq, Jens Kristian Therkelsen erseqqissaavoq.

Isumasioqatigiittoqarneratigut aappaagulu ataatsimeersuartitsinikkut nunaqarfiit naalakkersuinikkut pingaartinneqarnerat taassuma nuannaarutigaa.

- Namminersornerulerneq 1979-imi atuutilersinneqarmalli nunaqarfiit oqallisigineqartaqaat, iliuuseqartoqarnissaali amigaataasimalluni. Nunaqarfiit ineriartornerat arriitsuinnarmik pisimavoq, ilami uninngaannangajassimalluni. Tamatuma kinguneranik nunaqarfiit ilarpassui inukilliartulersimapput suliffiillu ikileriarsimallutik, Jens Kristian Therkelsen oqarpoq.

Tamatumunnga atatillugu oqaatigaa, nunaqarfiit ataannartariaqartut. Tamatumanili inuussutissarsiornikkut periarfissaqarnissaat suliffissaqarnissarlu pisariaqartut oqaatigalugu.

- Ukiut arfineq marluk ingerlaneranni nunaqarfiit pillugit isumasioqatigiittoqaqqinneratigut suleqatigiinnermik aallartitsisoqarsinnaanissaa, taamatullu nunaqarfiit ineriartorteqqinneqarnissaannut tunngaviliisinnaajumaartoq neriuutigaara, Jens Kristian Therkelsen oqarpoq.   

Nunatsinni nunaqarfinni aqutsisut siulittaasui 26-t borgmesterillu sisamaasut, Nuummi isumasioqatigiinnermi peqataapput. Taakku Naalakkersuisuneersunik aamma Inatsisartut ataatsimiitaliaani siulittaasut arlallit peqatigalugit, nunaqarfiit aningaasarsiornikkut isumalluutaasinnaalernissaat oqallisigissavaat.

Aningaasaqarnermut Nunamullu namminermut Naalakkersuisoqarfiup isumasioqatigiinneq pillugu tusagassiuutinut nalunaarummini erseqqissarpaa, nunaqarfiit siunissaasa oqallisaaneranni oqaatsit ilisimatoorpalaartut atorlugit, aningaasaqarnerup sammisallu tigussaanngitsut kisimik pineqannginnissaat pingaaruteqartoq.

- Nunap siunissaa innuttaasunit eqeersimaartunit suliffeqarfinnillu napasinnaasunit pilersinneqassaaq. Taakkulu iluatsissimanerminnut misilittakkatik oqaluttuariniarlugit isumasioqatigiinnermi aamma peqataassasut, tusagassiuutinut nalunaarummi ilaatigut oqaatigineqarpoq.

- Killiffigisatsinni pissusiviusoq aallaaviusoq tassaavoq, nungusaataanngitsumik ineriartortitsineq aamma aningaasarsiornikkut imminut napatinnerulernissamik anguniakkat aamma nammineernerulernissamik kissaateqarneq. Matumanilu inoqarfiit minnerit ineriartortinneqarnissaat pingaaruteqartoq, Aningaasaqarnermut Nunamullu namminermut Naalakkersuisoqarfimmit ilaatigut allapput.