Kalaallit kigutiloqaat

- Kigutiluttorpassuit tamarmik ikiorserneqarnissaat qularnarpoq. Nunatsinni kigutiluttut pillugit taama naliliisoqartarpoq.

Kigutigissaasut atuagassiaanni, Tandlægeblademi, tulliani saqqummersussami kisitsisit annilaammisaarnartut takuneqarsinnaapput.

Kalaallit meerartaasa inuusuttortaasalu kigutaat, nunani avannarlerni allani meeqqat inuusuttullu kigutaannut naleqqiullutik, ajornerupput.

Kalaaliaqqat arfinilinnik ukiullit tallimaagaangata, sisamat kigutaat putoqartarput. Danmarkimi, Norgemi, Sverigemi Finlandimilu meeqqanut taamatut ukiulinnut naleqqiullutik kigutaat putoqarnerusarput.

Kalaallit meerartaasa inuusuttortaasalu kigutaat putoqaannanngillat, aamma kigutaasa putui suliassarujussuusarput.

Nunatsinni illoqarfinni assigiinngitsuni kigutit putui misissuiffigeriarlugit allakkiaq allanneqarsimavoq. Ataatsimut oqaatigalugu, illoqarfinni minnerusuni kigulluttoqarneruvoq.