Kalaallit Københavnimiittut Prins Henrik naggammik inuulluaqqugaat
Prins Henriup ilisaaneranut atatillugu Københavnimi Christiansborg Slotskirkep saavani ikerasaliap sinaani inuit pisuttarfiat marlunngornermi ullaap tungaani nilleraluaqisoq inunnik tattoqippoq.
Takkussimasut ilagaat Nunatsinnut attuumassuteqartut arlallit, ilaatigut Nuummeersoq Jakobine Berthelsen, Københavnimi Østerbromi ullumikkut najugaqartoq.
AAMMA ATUARUK Prins Henriup ilisaanera kunngikkormiunut killitsinnartoq
- Nunatsinni oqartarnitsitut ningaatut asavarput. Uagununa ningaarput, KNR-imut taama oqarpoq.
Ilisisoqarnera, mobilikkut TV-app atorlugu toqqaannartumik malinnaaffigisani malunnartumik tussunngunartippaa. Ataatsimullu isigalugu, Prins Henriup toqunera pingasunngornermi februaarip 14-iani nalunaarutigineqarmalli tusagassiuutini sammineqarnera qanittumik malittarisimavaa.
Jakobine Berthelsen naapertorlugu Prins Henrik Nunatsinni ataqqisaasupilussuuvoq, prinsip pinngortitamik nuannarisaqarnera prinsitullu ’inuppalaartutut’ pissuseqarnera pissutigalugit.
- Uagut kalaallit inuppalaartupilussuuvugut, aamma taanna, Jakobine oqarpoq.
AAMMA ATUARUK Prins Henriup ilisaaneranut inuit 60-it missaat qaaqquneqartut
Illerfik takuniarlugu akunnerni pingasuni utaqqisoq
Nunatsinneersup Gerda Olsenip, Københavnimi Christianshavnimi ullumi najugaqartup, kunngikkormiut oqaluffimmut takkunneraniilli Prins Henriup anninneqarnissaata tungaanut aamma malinnaavoq.
Prins Henriup illerfianik Christiansborgs Slotskirkemi arfinngormalli inuit 19.300-nit sinneqartut takuniaasimasut aamma ilagaat.
AAMMA ATUARUK Inuppassuit Prins Henrimmut inuulluaqqusiartortut
- Sapaatiummat takusarpara, illerfik takuniarlugu naggammillu inuulluaqqusiniarlunga akunnerit pingasut utaqqivunga (…). Nunatsinnut angalasarneri kingumut eqqarsaatigaakka, aamma kunngikkormiut Nunarput pillugu qanoq tunniussaqarsimanersut eqqarsaatigisupilussuuara, Gerda Olsen taama oqaluttuarpoq.
Prinsilu inuttut nuannaartutut uummaarissutullu eqqaamaniarpaa, arsakumilu avillugit danskit imartaanni siaruarternissaannik affaasalu Fredensborg Slottip tunuani naatsiivimmi ilineqarnissaannik kissaataa ataqqinerarpaa.
Prins Henriup Roskilde Domkirkemi mausoleumimi Dronning Margrethemut Prins Henrimmullu sananeqarsimasumi ilineqarani taama pineqarnissani kissaatigisimavaa.
- Taamatut toqqaasimanera taamatullu ilioqqusisimanera ataqqisariaqarpara. Tamakku tamarmik ataqqisariaqarput, Gerda Olsen taama oqarpoq.
AAMMA ATUARUK Kalaallit ningaannarisutut pissusilersorfigisarpaat
