Kalaallit Københavnimi allamiullu

septembarip 26-at 2005 16:51

Kalaallit Danmarkimiittut siullerpaamik akulerutitinnissamut siunnersuisutut taaneqartartuni ilaatinneqalissapput.

Akulerutitinnissamut siunnersuisut kommunit siunnersortarpaat Danmarkimi nunassissimasut inuiaqatigiillu ikinnerussutillit qanoq pitsaanerpaamik qallunaanut inuiaqatigiinnut akulerutitinnissaat.

Danmarkimi kalallit tunngaviusumik qallunaatut nalinginnaasutut nallersuunneqartarput.

Københavnillu ilaqutariinnut borgmesteria, Bo Asmus Kjeldgård, oqarpoq kalaallit amerlanersaat qallunaatulli inuiaqatigiinni akuulluartut.

Taamaattorli Bo Asmus Kjeldgård-ip maanna kalaallit periarfissippai kommunip akulerutitinissamut siunnersuisuini peqataalernissaannut.

Oqaaseq akulerutitinneq atorneqaraangat nalinginnaasumik Irak-imiit, Somalia-miit, Afghanistan-imiit il.il. Danmarkimut nunasisut eqqaaneqartarput.

Kisianni kalaallit Danmarkimi najugallit aamma ilaqartarput ajornartorsiulinnik nunanit allanit nuuttunisulli qallunaanut inuiaqatigiinnut akulerunnissaminnut.

Hikmat Hussein-i Københavnip akulerutitinnissamut siunnersuisuini siulittaasup taama aaqqissuussineq nuannaraa.

Isumaqarpunga isumassarsiatsialaasoq, kalaallimmi uagutsitulli inuiaqatigiittut ikinnerussuteqartutut ajornartorsiuteqartarput. Oqaatsitigut, ineqarnikkut suliffissatigullu uagutsitulli ikinnerussuteqartutut ajornartorsiuteqartarput.

Nikoline Ziemer februaarimi kalaalersatut folketingimut

SF sinnerlugu qinigassanngortittoq – Københavnimilu kalaallinik ajornartorsiutilinnik annertuumik suliaqartarsimasoq kalaallit Københavnimiittut periarfissaat nutaaq pillugu nuannaarpoq.