Kalaallit Japanimiittut ajunngillat
Joachim Jørgensen 23-nik ukiuoqartoq aamma Kristina Hendriksen 22-nik ukioqartoq Kalaallit Nunaannersut maanna Japanimiipput.
Atomimik nukissiorfiup qaartoornerata kingorna qinngornernik ulorianartumik navianartortsinneqarsinnaanertik nalorninartorsiutigigaluarlugu ajunngillat.
- Ernumanarsilerpoq, atomimmi qinngorneri ulorianartut takunneqarsinnaanngillat taamaattumik ernumanarsilerpoq, Joachim Jørgensen oqarpoq.
Joachim Jørgensenip Japanimi ilisimatusartup nunap sajunnerata kingorna tsunaameqarneratalu kingorna pisut tamaasa eqqarsaatigalugit, navianartorsiorneq annertusissappat nunatsinnut angerlarusussinnaanini eqqarsaatersuutigisimavaa.
Kristina Hendriksen Tokyomi najugaqartoq nunap sajunnerata kingorna pisut malinnaaffigereerlugit annilaanganeq misigissutsimini pigalugu oqaluttuarpoq.
- Nuna sajuminilaaginnaleraangalluunniit annilaangalertarpunga, annilaanganaqaaq qaangiuniissaalu erininaqaaq.
Kristinap aamma oqaluttuaraa inuit najugaqarfinni nutaannginnerusuni najugaqartut nunap sajoqqilersinnaaneranik aarlerisaarinermi hotelinut nutaaliaanerusunut nutsersimasut, tassa nuna sajoqqilissagaluarpat ulorianannginnerusumiinnersartik qulakkeerniarlugu.
- Uanga inigisara nutaaliaanerugami ajorpallaarnavianngitsoq paasitsinneqarpunga, Kristina Hendriksen oqarpoq.
Nunanit allaneerlutik Japanimi ilinniariartut ilaqutaasunik angerlaqquneqarsimasut Kristina nalunaarfigineqarsimavoq.
- Ulorianarsivallaassanngippat uanga Japanimiiginnarnissara kissaatigigaluarpara.
Japanimi nipilersornermik ilinniartoq, ukiullu tallimat Japanimi najugaqareersimasoq Kristina Henderiksen oqarpoq.