Kalaallit inuusuttut Finlandimi pikkorissaqataasut
Pikkorissaanerup aappaa sapaatip akunnerani matumani Saamit illoqarfianni Inarimi Finlandip avannaaniittumi ingerlanneqarpoq.
Pikkorissartitsineq nunat inoqqaavisa Naalagaaffiit Peqatigiinni suliaannut Issittumilu Siunnersuisoqatigiinni suleqatigiinnermut sammiveqartinneqarpoq.
Nunatsinnit ilinniartut peqataasut tassapput Tukumminnguaq N. Olsen, Tina Kûitse, Jakob Thorin aamma Kuluk Lynge tamarmik Ilisimatusarfimmi ilinniartut.
Nunatsinnit ilinniartitsisut tassaapput ICC Kalaallit Nunaata siulittaasua Hjalmar Dahl aamma ICC-p pisortaa pikkorissaanermillu ataqatigiissaarisoq Mads Fægteborg. Saamit immikkut ilisimasalinnik aamma ilinniartitsisuutitaqarput.
Maannamut misilittakkat ajunngilluinnartutut nalilerneqarput. Saamit Siunnersuisoqatigiivisa siulittaasuat Àili Javo pikkorissartitsineq juunip 15-iani tikeraaramiuk suliniutip pitsaassusaa oqaatigaa, pingaartumik nunani tamalaani suliniarnermut inuusuttunik soqutiginnilersitsinissaq pingaaruteqaqisoq oqaatigalugu. Ilanngullugu oqaatigaa, inuusuttut akunnerminni ilisareqatigiinnermik ikinngutigiilernermillu pilersitsisarnerat siunissaq eqqarsaatigalugu ICC-p Saamillu Siunnersuisoqatigiivisa akornanni suleqatigiinneq nukittorsarumaaraa.
- Ilissi siunissami siuttunngortussaavusi. Qularinngilara piffissami aggersumi Naalagaaffiit Peqatigiinni Issittumilu Siunnersuisoqatigiinni issiaqatigiittalerumaartusi, Àili Javo inuusuttunut oqaaseqarnermini ilaatigut oqarpoq.
Piukkunnarsaalluni pikkorissartitsinermi inuusuttut nunatsinneersut saamillu nunaanneersut 12-it peqataapput.
