Kalaallit inuusuttaannut nittartagaq piariilerpoq
Ilinniartunngorlaaq illoqarfimmi allami, ulluinnarni ajornartorsiorneq, nipilersukkat, peeqqat sammisallu allarpassuit inuusuttunut nittartakkat nunatsinni nutaanersaanni nassaassaassapput. Isumassarsisuuvoq Otto Motzfeldt inuusuttut soqutigisaannik nittartakkamut ataatsimut eqiterissamik siunertaqartoq.
- Piareersarninni kattuffiit Kalaallit Nunaanni inuusuttunik sullissisut oqaloqatigisimavakka isumassarsiaralu assut ilassilluarpaat. Isumassarsiap piviusunngortinnissaata suli tamaviaarutiginerulerneranik tamanna kinguneqarpoq. Tassami inuusuttut pineqartut tassaapput internetimik atuinerpaajusut. Nunami maani internet atorlugu ujaasineq akisusinnaavoq taamaammat atuisunut soqutiginaateqarsinnaasut ataatsimut ilioqqarniarsimavakka, Otto Motzfeldt KNR.gl-mut oqarpoq.
Nittartagassaq qaammat ataaseq missaliorlugu qaangiuppat naammassissaaq suliarinittuatalu neriuutigaa Namminersorlutik Oqartussat kommuunillu sisamaasut paasissutissanik ikkunneqarsinnaasunik aamma tunniussaqarumaartut. Sapaatit akunnerini aggersuni Otto Motzfeldtip nunatsinniinnermini tamanna suliariniarpaa aammalu inuusuk.gl-imut atatillugu attaveqarnerit kingulliit naammassiniassallugit.
- Pingaartittorujussuuara inuusuttut maani najugallit nittartakkap suliarinerani akuutinnissaat. Atuisussat qisuaariaateqassajunnarsipput taamaammat nersualaarinerit isornartorsiuinerillu tusaaniartorujussuussavakka. Tassami inuusuttut atuisussat tassaapput sunik pisariaqartitsinerminnik ilisimaarinnittut. Taamaammat nittartagaq ingerlaleriarpat attaveqatigilernissaat qilanaaraara. Nittartagaq aamma atulereerpoq taamaammat isumassarsiaqaraanni nalunaarutiginissaat takannarujussuaq, Otto Motzfeldt oqarpoq.
