Kalaallit inuussutissaliaannut kajumissaat

Akissarsitinneqartussaq tassaasariaqarpoq inuk, kattuffik imaluunniit suliffeqarfik, nerisassanik Nunatta tunniussinnaasai aallaavigalugit inuiaqatigiinnut akisussaaffeqarluni inerisaanermik suliaqartoq. Kalaallit Nunaanni Brugsenimiit tusagassiuutinut nalunaarummi taama allapput.

Nerisassat Nunatsinneersut Nunatsinni Brugsenit tunisassiarisartagaat ukiuni kingullerni amerliartuinnavipput, naatitallu nunatsinneersut - soorlu naatsiiaat - tuniniarneqarnissaanut pisiniarfinnut allanut suleqatigiissutigineqalersimasoq nittarsaanneqarluni. Aamma nersussuit neqaat Nunatsinneersut tunisassiarineqartalernissaat maanna sulissutigineqaleruttorpoq.

- Nerisassat Kalaallit Nunatsinneersut tunisassiarineqartarnerisa suli annertusaavigineqarnissaat Nunatsinni Brugsenit siulersuisuunerisa tapersersorpaat. Taamaasiortoqarneratigut Nunatsinni suliffeqarfinnik pilersitsisoqarnerulissaaq, assartuinermilu aqqutip sipaarutigineqarsinnaanera mingutsitsinnginnerunermik kinguneqassalluni, Kalaallit Nunaanni Brugsenit siulersuisuunerini siulittaasoq, Ib Lennert Olsen, oqarpoq, ukiumullu akissarsiaritinneqartussat 100.000 koruunit, Nunatsinni Brugsenit ukiumoortumik suliniutinut assigiinngitsunut tapiissutigisartagaanit, 1,2 millionit koruuniusunit, ilanngaatigineqassanngitsut oqarluni. Tassa ukiumoortumik akissarsiassaq peqatigiiffiit, imaluunniit pisiniarfiit, ingerlanneqarnerinut atorneqarsinnaassanngillat.

Ukiumoortumik akissarsiassaq aappaagu januaarimi tunniunneqassaaq. Akissarsititsinissamut illit piukkussaqaruit, piukkussavit aqqa Kalaallit Nunaanni Brugseninut e-mailikkut imaluunniit allakkatigut decembarip ulluisa 31-iat nallertinnagu nassiutereersimassavat.