Kalaallit inuusaasiat salliuteqquaa

- Qanoq-una kalaallit uagut qallunaajulluartigilerniartugut. Piffissanngunnginnerpa oqaluttuarisaanerput kalaallillu inuusaaserput tunngavigalugit akisussaassusermik takutitsinissamut, aatsaammi taamaaliorutta allanut pituttugaanngitsutut misigisinnaalissagatta, taama oqarpoq socialantropolog Aviâja Egede Lynge Nuummi Ilinniarfissuarmi sapaatip-akunnerata naanerani oqalugiarami.

Oqalugiarnerata qulequtaa nunani avannarlerni nunasiaataasimasuni innuttaasut inuiattut eqqarsaqqilernissaannik suliniummut, saqqummersitsinernut oqallitsitsinernullu attuumassuteqarpoq, tassani Kalaallit Nunaat namminersortoq anguneqassappat suut pisariaqartinneqarnersut oqalugiaatigineqarlutik.

Aviâja Egede Lyngep aallaavigai nammineq nunatsinni atuarnermini paasisani - qallunaat atuakkiaat ilinniartitsisullu qallunaat aqqutigalugit - Kalaallit Nunaata nunarsuarmi nunasiaatit pitsaanersaattut oqaatigineqartarnera. Tassami kalaallit qallunaanut qujamasuttussanngortinneqarsimapput qallunaat nunasiaateqarnermikkut ikiuiartornerartuarsimammata.

- Namminersorneruleraluarluta inuiattut nakuunerulersimanngilagut. Naak tamanna anguniagaagaluartoq, killup tungaanut ingerlavugut. Qallunaat 1721-imili nunatsinniilernerat suli malunnarpoq, inatsisartuni kalaallit amerlanerugaluartut atorfinni qaffasinnerni qallunaat inissisimajuarput, aalajangiinernut pingaartunut sunniuteqartaqalutik.

Assersuutitut taavaa Sydafrikami apartheidimik ingerlatsinikkut inuiannik nunasiaatilittut allatulli naqisimannissimaneq.

- Oqaatigiuminaapporli qallunaat naalagaaffiata kalaallit imminnut tatiginerata naqisimanissaa siunertarisimaneraa. Timi tarniluunniit, sorleq peeraanni ajornerua, Aviâja Egede Lynge aperaaq.