Kalaallit inuiattut ikinnerussuteqartutut inisseqquaat
Kalaallit ukiuni arfineq marlunni Danmarkimeereeraangamik nakorsiartillutik nutserisoqarsinnaatitaanertik annaasarpaat - naalagiaraangamillu tamatigungajak taamaallaat qallunaatut naalagiartinneqartarput, Danmarkimi palasip kalaallip pisariaqarluinnartumik Danmarkimiittut sallutittussaammagit.
Pissutsit tamakkua kalaallit Danmarkimiittut inuunermini atugaasa politikkikkut pitsanngorsaaqqusilluni oqallisaanerulernerannik kinguneqarput.
Danmarkilli kalaallit inuiattut ikinnerussuteqartutut akuersaarpagit ajornartorsiutit tamakkua tamarmik peerneqarsinnaagaluartut Amnesty Internationalip nunatsinni immikkoortoqarfiani siulittaasuugallartoq Roland Thomsen isumaqarpoq.
- Nunat tamat isumaqatigiissutaat Danmarkip malittariaqarai apeqquserneqarsinnaanngilaq, aamma taamaappoq kalaallinut atatillugu, Roland Thomsen oqarpoq.
- Namminersorlutik Oqartussaaneq eqqunneqareermat isumaqatigiissutaasumut taakkunannga aamma malinneqartussaavoq. Isumaqatigiissummi sinaakkutaasut atuareerlugit tamanna apeqquserneqarsinnaangitsutut isigaara, suliliuna Danmarkip atuutsilersimanngiinnaraa, Roland Thomsen oqarpoq.
Namminersorlutilli Oqartussat Københavnimi aallartitaqarfiani siunnersorti Adam Worm nalunaarpoq, isumaqatigiissutip atuutsinneqarneranik Europarådimi nakkutilliisut siorna Danmarki sakkortuumik isornartorsiormassuk Namminersorlutik Oqartussat kalaallit naalagaaffiup iluani inuiattut ikinerussutilittut inissinneqarnissaat kissaatiginngikkaat.
Nunat tamat isumaqatigiissutaat nunanit avannarlernit assigiinngitsunik paasineqartarpoq. Taamaalillutik Norgemi Sverigemilu inuiaat arfinillit tallimallu inuiattut ikinnerussutilittut inissippaat - saamit, romat juutillu taakkununnga ilanngullugit.
