Kalaallit inuiattut akuerineqarnissaat qaqeqqinneqarpoq

Suliaq, kalaallit inuiattut akuerisaanerannut tunngasoq, Inuit Issittormiut Siunnersuisoqatigiiffiata, ICC-p, Saamillu aallartitaasa ullumi isumasioqatigiinneranni isiginiarneqarpoq. Illu Atlantikumi ICC-mi oqalugiarpoq namminersorneq pillugu ataatsimiititaliap siulittaasua, Jonathan Motzfeldt.

Taanna ima oqarpoq:

- Kalaallit inuiattut akuerineqarnissaat, 1979-ikkunni taamanikkut ajornartorsiutigisarput, ullumi oqalugiaatinni ilanngullugu taavara, nunanut allanut ministereqarfiup allakkiami ilaanni uppernarsarlugu aamma allaatigimmagu kalaallit inuiattut aamma isigineqalernissaat akornutissaqartinnagu. Isumaqarpunga ullumikkut oqalugiarninni malugineqarluartut taanna ilagigaat, tassami kingornatigut oqaaseqartut oqaaseqarfigalugu nuannaralugu aamma tigummassuk, Jonathan Motzfeldt oqarpoq.

Nangipporlu:

- Tassa imaappoq, katersorsimasuni taama ittuni, alloriarnerit taama ittut, pingaartuupput, soorunalumi aamma oqarpunga, nunap nammineq pisuussutaanik atuinerput, isumaqatigiinniarnerillu tassunga tunngasut suli ingerlapput, Jonathan Motzfeldt naggasivoq.

Nunat inoqqaavisa nunamik piginnittussaanerat pillugu Naalagaaffiit Peqatigiinni maajimi ataatsimeersuartoqassaaq, New Yorkimi.