Kalaallit inuiaqatigiinnut ajornannginnerusumik akuunerulersinneqartariaqarput

Danmarkimi partiip De Radikalep Københavnimi immikkoortortaa, Nuummilu Demokraatit, kalaallit Københavnimi najugaqarniartut inuiaqatigiinnut ajornannginnerusumik akuunerulersinneqarnissaat pillugu partiit taakku marluk qaninnerusumik suleqatigiilernissartik siunnersuutigaat.
Allattoq Mads Lynge
novembarip 12-at 2013 04:18

Innuttaasut inuiaqatigiinnut peqataanerulersinneqarnissaannut Københavnip kommuniata suliniutai, kalaallit aamma ilaaffigisariaqarpaat, suliarlu Nuummi aallartereertariaqassaaq, assersuutigalugu napparsimalersinnaanermut sillimmasigaanermut allagartartaarsinnaassallutillu aningaasaateqarfimmi kontotaartinneqarsinnaassallutik, suliffittaarlutillu najugaqarfissaminnik qulakkeerinnissinnaassallutik.

Kalaallit Danmarkimi innuttaassuseqarput, assersuutigalugulu nunasisut qallunaanut ilanngutivinnissaannut atatillugu suliniutinut ilaasinnaanatik. Tamannalu ajornartorsiutaavoq.

Kalaalerpassuit Danmarkiliartarput qallunaatut iluamik allassinnaanatik oqalussinnaanatilluunniit, najugaqalernermilu inatsisit malittarisassallu sukumiinerusumik ilisimasaqarfigisarnagit, inunnillu attaveqarfigisinnaasaminnik peqarneq ajorlutik, Danmarkimiluunniit sulisartoqarnikkut malittarisassanik ilisimasaqarneq ajorlutik:

- Kalaallit qallunaatut isigisaraluarpavut, inuaiqatigiilli allarluinnarmik kultureqartuullutik, allarujussuarmillu qisuariartaaseqarlutik, pisortanillu Kalaallit Nunaanni sullinneqartarnerat allarluinnaalluni, Tommy Petersen, De Radikale sinnerlugit Københavnip borgerrepræsentationianut, tassa kommunalbestyrelsianut qinigassanngortittoq oqarpoq.

Kalaallit Nuummiit Københavnimut nuunniarlutik eqqarsaatersuuteqartut taamaammat Danmarkimi inuunissamut piareersarneqarsinnaannut periarfissinneqartariaqartut, De Radikale Demokraatillu siunnersuutigaat.

Kommuneqarfik Sermersuumi borgmesterip sinniisussaa siulleq Anda Uldum oqarpoq kalaallit Danmarkimut nuunnissamik eqqarsaatersuuteqartut paasissutissanik Kommuneqarfik Sermersuumit sapinngisamik tunineqartartut:

- Københavniliannginnermi aningaaserivimmi kontotaarsinnaanissaq, napparsimalersinnaanissamut sillimmasigaanermut allagartartaarsinnaanissaq, najugaqarfigisinnaasassamik aallalinnginnermi isumannaarisimanissaq, suliffissaqartitsiniarnikkullu sullissineq matumani iluaqutaalluinnarsinnaavoq, Anda Uldum oqarpoq.