Kalaallit ilungersussaqaat
Amerikap nunavittaani assammik arsarluni unammersuarnerni kalaallit angutitaat nunarsuarmi pissartanngorniunnernut anngukkaluarlutik, soorluuna holdeqatiminnut naleqqiullutik ilungersornerunissaat ilimanarsereersoq.
VM-imi ingerlaqqittussat holdinut sisamanut agguarneqarneranni holdit angusarissaarnerat naapertorlugu inissitsiterneqarput. Holdimi pitsaanerit qullernut inisseriarlugit, pitsaanerit tullii qulliit aappaanut, pingajuat pingajuattut sisamaallu sisamaattut inissinneqarput. Taamaasillutik assammik arsartartoqatigiit pitsaanerpaat pitsaannginnerpaat naapittussanngorlugit. Ima paasillugu: Holdini sisamaasuni pitsaanerpaat aallaqqaammut imminnut naapissanngillat. Assersuutigalugu danskit angutitaasa, nunanut allanut assammik arsartartut pitsaanerpaanut ilanngunneqartut, holdiminni pitsaannginnerpaat kisiisa taamaalillutik unammisussaassavaat.
Kalaallit Nunaat holdinut pitsaannginnerpaanut ilanngunneqarnermikkut artorsarnissaat ilimanarsereerpoq. Kalaallit Nunaatut pitsaannginnerpaatut inissitat nunat allat tassaapput Argentina, Angola, Sydkorea, Qatar aamma Australia.
