Kalaallit Illuutaat ukiormanna nalliuttorsiornerit annersaannut piareerput
Kalaallimmi Illuutaat Københavnimiittoq kalaallit Københavnimi kulturikkut katersuuttarfissaattut ukiut 40-t matuma siorna atoqqaartinneqarpoq. Tamannalu inuiattut ullorsiornermi juunip 21-iani ilanngullugu nalliuttorsiutigineqassaaq.
Aliikkusersuisussallu ilaatigut tassaapput erinarsoqatigiit Aavaat aamma Mik, Svend-Åge Jensen kalattoortitsissaaq Mads Lumholtilu nipilersoqatinilu tusarnaartitsissallutik. Aamma meeqqanut sammisassaqartitsisoqassaaq, kaffillertoqarluni Strøgimilu tissaluttuliamut Storkespringvandimut ingerlaaqatigiittoqassalluni. Ukiormanna oqalugiartussat tassaapput peqatigiiffiit sinnerlugit Einar Lund Jensen aamma Bodil Johansen kiisalu kalaallit illuutaata ningiua Leise Johnsen. Nuummi Nuutoqqami nalliuttorsiorneq KNR-ikkut toqqaannartumik aallakaatinneqartoq isiginnaarussuakkut aamma malinnaavigineqassaaq. Aammattaaq Royal Greenlandip, Polar Seafoodip, Sulisitsisut Peqatigiiffiata Nunattalu Danmarkimi Sinniisoqarfiata aningaasaliissuteqarnerisigut pulaartunut tamanut nerisassanik sassaalliisoqassaaq.
Odensemi Nunat atlantikup avannaamiut Illuutaanni inuiattut ullorsiornerput perngaammik nalliuttorsiutigineqassaaq.
Nalliuttorsiorneq erfalasulernermik erinarsoqatigiillu Umiap erinarsornerannik aallartinneqassapput. Tamannalu pereerpat kaffillertoqassaaq. Odensep Kommunianeersoq Steen Møller oqalugiassaaq soorlu aamma kalaallit peqatigiiffianni Umiami siulittaasoq Helga Maqi Nielsen oqalugiassalluni. Kristian Søgaardip Trio nipilersorlutik aliikkusersuissapput.
Aarhusimi Aalborgimilu kalaallit illuutaat maannakkorpiaq nutaamik pisortassarsiuleruttorput. Taamaakkaluartoq inuiattut ullorsiorneq pisarnertut nalliuttorsiutigineqassaaq.
Aarhusimi erinarsoqatigiit Kajak erinarsussapput Royal Greenlandillu tunissutaanik brunchertitsisoqassalluni. Tamakku pereerpata tupermi bankortoqassaaq Peqatigiiffillu Kajak siaasaalluni ulloqeqqasiortitsissalluni aammalu naatsiivimmi nipilersortitsissalluni. Ulloq naallugu ikumatitsisoqassaaq, snobrødiliortoqarluni, pannakaaliortoqarluni popcorniliortoqarlunilu.
Aalborgimi borgmesterip tullia Daniel Nyboe Andersen erfalasulernermi oqalugiartuussaaq erinarsoqatigiillu Ikinngutigiit erinarsussallutik. Tassanissaaq Royal Greenlandip tunissutaanik brunchertitsisoqarniarpoq. Lise Andersen aamma Anna Lynge taalliaminnik atuaassapput aammalu Ivalu Judithelu nipilersorlutillu erinarsussallutik. Kiisalu ukiumoortumik kaagiliornermik unammisitsisoqassaaq meeqqallu pississaartarfimmi pinnguartinneqassallutik.
