Kalaallit Illuutaat Odensemiittoq naggataarpoq
Atlantikup avannaamiut Illutaavat Odensep Umiarsualivianiittoq novembarip qulingiluaani pisortatigoortumik ammaanersiorneqassaaq, ullorlu taanna aatsaat illu tamaat pisiniarfittaarlu iserfigineqarsinnaassallutik. Oktobarilli 31-ianit inini alliup tulliini siunnersuisarfik ammasassaaq, illullu tunuatigut isertoqarsinnaassalluni.
Atlantikup avannaamiut Illuutaanni pisortaqatigiit maannakkorpiaq kalaallinik savalimmiormiunillu ilinniartunik ilinniartut ineqarfiini nutaarluinnarni najugaqarusuttunik pissarsiorpoq, aammalu neriniartarfittaamik aqutsisussap aqqa nalunaarutigeqqammerlugu.
Tassaavorlu Stefan Gravesen, Aarhus Folkekøkkenimi pisortatut atorfeqarsimasoq. Taassuma nunat avannarliit frankrigimiullu nerisassaataannik nerisassiortoqartarnissaanik neriorsuivoq.
Atlantikup avannaamiut Illuutaat illuliassanik titartaasartunit Isager Arkitekterinit Cornelius + Vöge peqatigalugu titartagaavoq, ilaatigullu savalimmiormiut illulioriaasiat isumassarsiorfigisimallugu. Illup sananeqarnera 48 mio. koruunit missaannik akeqarput, taakkulu affaasa missaat kommunimit akilerneqarsimallutik.
Atlantikup avannaamiut Illuutaata ammarneratigut Odense tassaalissaaq Danmarkiimi illoqarfiit Kalaallit, Islandimiut Savalimmiormiullu Illuutaannik kattutsitsisut siullersaat.
