Kalaallit Illuutaat Bornholmimi aasaru inuppassuit naapinneranni peqataassapput
Ilaatigut Bornholmimi aasaru Folkemødemi taallugu inuppassuit naapisimaanissaanni peqataatitaqarnermikkut tamanna naammassiniarpaat.
Naalagaaffeqatigiit avannarlersaanni sulerisarnersugut qallunaat Østersømi qeqertami seqertarluartartumi aasaru ilisimasaqarfiginerusinnaalissavaat.
Taama pisoqarsinnaalissaaq Kalaallit Illuutaat sisamaasut ataatsimoorlutik ataatsimiittuni saqqummiiiviliorpata, qaammarsaanermi taavalu Nunatsinni, Nunatta Danmarkillu akornanni aamma kalaallit Danmarkimi najugaqartut akornanni pissutsit oqallisigineqarneranni sinaakkusiisussamik.
Aarhusimi Kalaallit Illuutaata pisortaa, Jørn Holbech KNR-imut oqaluttuarpoq.
- Kalaallit Danmarkimi nipaat politikerinit marlunnit ersersinneqartarpoq, kisianni Kalaallit Nunaata Danmarkimi tusarneqarluni oqaluuserineqarnissaa pisariaqartuaannarpoq.
Tusarnaariat amerlasuut
Tamannalumi aasaru tallimassaanik Folkemødeqarpat periarfissaqarluassaaq.
Tassunga takkuttartut ukiut tamaasa amerliartuinnarput, siornalu inuit 25.000-it ataatsimiigiarput, tusagassiortunit 700-nit malinnaafigineqarlutik.
Taamaattoqarneralu atorluarneqarsinnaasssasoq, Jørn Holbechip neriuutiga, aamma ilaatigut Kalaallit Illuisa sumut atornerqarsinnaanerinik oqaluttarnissamut.
- Kalaallit Illuutaat suleqatigiisillugit Ataatsimiiffimmi ataatsimut saqqummissuugut soqutiginarsarlugillu, Jørn Holbech oqarpoq.
Folketingimi ilaasortat Aaja Chemnitz Larsen aamma Aleqa Hammond Kalaallit Illuutaasa saqqummiivissaani peqataasussatu maannamuugallartoq kisimik allassimapput, najuuttussat sinneri upernaaru nalunaarutigineqasaallutik.
Katerisimaarnissaq, Folkemødet, Allinge Bornholmimiittumi aappaagu juunip 16-aniit 19-anut pissaaq.
