Kalaallit ilinniartut USA-mi periarfissaqarluartut
Kalaallit inuusuttut nunanut allanukarlutik ilinniariartariaqarput. Tamanna Ilisimatusarfiup rektoriata Tina Parsip alaatsinaappaa. Ulluni makkunanerpiaq USA ukkatarineqarpoq.
Allattoq Sara K. Jakobsen
septembarip 09-at 2014 12:22
Ullumi Danmark-Amerika fondemi Fulbright Kommissionimilu pisortaq, Marie Mønsted, Nuummi GU-mi pingasut qeqqaniit Eskimo Slottemi naapinneqarsinnaavoq, aqagulu Ilisimatusarfimmi International Dag ataatsimiit sisamanut saqqummiusseqqissaalluni.
Anguniangaavoq ilinniartut nunanut allanukartinneqartarnissaat, ilinniartullu periarfissaannik ilitsersuullugit, soorlu USA-mi ilinniangaqarnikkut.
AAMMA ATUARUK Tine Pars: Oqaatsinik piginnaasaqarnissaq pisariaqarpoq
- USA-mi ilinniarniaraanni qanoq iliortoqartarpa. Nunamut isissutissaq visum qanoq pisarpaat, aningaasammi qanoq?
Inuusuttoq aallaaviussaaq, USA-mi suniarpit, ilinniarnissannullu suut pisariaqartippigit, aningaasaateqarfimmi Danmark-Amerika fondemi Fulbright Kommissionimilu pisortaq Marie Mønsted oqarpoq.
Taanna isumaqarpoq nunarsuup sortaanukarneq ilisimasariaqartoq, erseqqissarlugulu USA-mi ilinniarnerup praktikkernerulluunniit suliamut pikkorinnerulerneq kingunerisinnaammagu, aammalu nunarsuarmioqatinut attaveqalernermik kinguneqarsinnaammat.
USA pitsaaqutilik
- Danmarkimiit Kalaallit Nunaanniilluunniit allamukaraanni qanoq iliortoqartarnersoq ilisimasariaqarpoq. Aammalu nunarsuarmi ilisimatusarfiit pitsaanersaat USA-miimmata, amerikamiullu attaveqaqatigiinnermut pikkorissorujussuupput, inuunerup sinnerani atorneqarsinnaasunik. Taamaattumik isumaqarpunga iluaqutissarpassuaqartoq, Marie Mønsted oqarpoq.
Suliniaqatigiiffik Nuummi ilinniarfinnik attaveqareersoq, sinerissami ilinniarfinnut allanut angalasassanerlutik suli pilersaaruteqanngillat. Maannakkulli periarfissarsiorlutik aallartipput.
