Kalaallit ilinniartut Tuluit Nunaanni masterinngorniarnissamut maanna qinnuteqarsinnaalerput

Kalaallit ilinniartut Tuluit Nunaanni universitetini 2027-2028-mi masterinngornissamut stipendiamut maanna qinnuteqarsinnaalerput. 

Ilinniartitaanermut naalakkersuisoqarfik tusagassiuutinut taama nalunaaruteqarpoq.

Chevening-stipendiamik taaneqartartumut qinnuteqartoqarsinnaavoq. Taanna inunnut nunaminni pitsaasumik allanngueqataaniartunut sammitinneqarpoq.

Qinnuteqarnissamut piumasaqaatit ilaatigut tassaapput, ilinniarnerup naammassereernerani nunaminut sivikinnerpaamik ukiuni marlunni uternissamik pisussaaneq.

- Qinnuteqartoqarsinnaalermat nuannaarutigaara. Kalaallit bacheloritut ilinniakkaminnik naammassinnissimasut Tuluit Nunaanni universitetit pitsaanersaasa ilaanni ilinniagaqaqqinnissamut, kiisalu nunat tamalaat akornanni attaveqaatinik pilersitsinissamut periarfissaq immikkut ittoq maanna atorluarsinnaavaat. 

- Neriuppunga amerlasuut qinnuteqassasut, kingornalu ilisimasatik misilittakkatillu nutaat Kalaallit Nunaata ineriartortinneqarneranut iluaqutaasumik atussagaat, ilinniartitaanermut naalakkersuisoq Nivi Olsen oqarpoq.

Tuluit Nunaannut masterinngorniarnissamut periarfissaq Nivi Olsenip Tuluit Nunaatalu Danmarkimut aallartitaata Victoria Elizabeth Billingip suleqatigiinnissamik isumaqatigiissummik maajip ulluisa 20-anni atsioqatigiinnerisa malitsigaa.

- Isumaqatigiissut Kalaallit Nunaanni bacheloritut ilinniakkaminnik naammassinnissimasut Tuluit Nunaata Chevening-stipendianut qinnuteqarnissaannut periarfissiivoq. Tamatuma peqatigisaanik Kalaallit Nunaata Tuluit Nunaatalu akornanni ilinniartitaanikkut sivisuumik suleqatigiinnerup aallartinnera malunnartinneqarpoq, ilinniartitaanermut naalakkersuisoqarfik allappoq.

Kalaallit Nunaannut stipendiamut qinnuteqartut ilaatigut Kalaallit Nunaanni najugaqartuussapput Cheveningillu qinnuteqartunut piumasaqaataanik allanik naammassinnissallutik.

Piumasaqaatit suunersut Cheveningip nittartagaani takuneqarsinnaapput.

Oktobarip ulluisa arfernat nalunaaqutaq 11:00 qinnuteqarnissamut killigititaavoq.