Kalaallit ilinniartut SU-mik ilinniartuunersiaqalissapput
Naalakkersuisut aqqutissiorsimavaat kalaallit Danmarkimi ilinniagaqartut allaanerusumik aaqqiissuteqarfiginissaat. Taakku Danmarkimi SU-mik pisartagaqalersinnaapput nunatsinniit ilinniartuunersiat pitsaaqutaat annaanngikkaluarlugit. Annaaneqartussaanngitsut ilagaat nunatsinnut feeriarnermi akiliutsittarneq, kigutit nakorsaaannut tarnillu pissusaannik ilisimasalimmut akiliutsittarneq, angalanermut tapit aammalu atuagarsinermi tapit.
- Periarfissaasimavoq ilinniartut namminneq toqqaasinnaanertik atorlugu Danmarkimi SU-mut nuussinnaanerat. Tamatumali pitsaaqutai nalorninartoqartinneqarsimmapput. Maannal pitsaaqutit ersarinnerulerput. Pitsaaqutit atuutereersut allanngussanngillat aammalu kalaallit ilinniagaqartut aningaasat tigusagaat amerliallalaartussaapput, ilinniartitaanermut ilisimatusarnermullu naalakkersuisoqarfimmi pisortaq Michael Kristensen KNR.gl-mut oqarpoq.
Namminersorlutik Oqartussaniit ilinniartut Danmarkimi naammassinermi kingorna nunatsinnut angerlartarnissaat. Misissuinerit takutippaat naammassereernermi kingorna suli Danmarkimi najugaqartut naammassisut affarisaraat, tamannalu ilorraap tungaanut saatinniarneqarpoq.
- Kalaallit ilinniagaqartut pitsaanerusumik paasissutissiiviginiarlugit ilinniartitaanermut naalakkersuisoq Palle Christiansen atorfilittanilu Danmarkiliarniarput aaqqissuussineq nutaaq taassumalu kingunerisassai nassuiaassissutigiartorlugit. Danmarkimi Kalaallit Illuutaanni tamanna pisassaaq. Ilinniartunut paasitikkusupparput nunatsinnut angerlarnissaat assut kissaatigigipput inuiaqatigiit ineriartortinneranni peqataaniassammata, Michael Kristensen ilisimatitsivoq.
Aningaasallu sipaarneqartussat nunatsinni ilinniartitaanerup nukittorsarnissaanut atorneqassapput. Tassani ilinniarnertuunngorniarfiit pineqarput qaffasinnerusumik ilinniagaqarniartunik pilersitsisarmata.
- Aningaasanut inatsisissatut siunnersuummi allaqqavoq 17 millioner koruunit sipaarneqassasut. Taakku GU-p iluarsaateqqinneranut atorneqassapput. Taanna aqqutigalugu ilinniakkamik ingerlatitseqqinniartut pitsaanerpaamik aqqutissiuunniarpagut, Michael Kristensen KNR.gl-mut oqarpoq.
SU pillugu uani atuarsinnaavutit: http://www.su.dk/SU/SATSERSU/Sider/default.aspx