Kalaallit ilinniartut politikkimik soqutigisaqarpianngillat
Folketingimi ilaasortat Imarpiup avannaani qinikkat suleqatigiiffiata ilinniartunut naapitsitsinissaanut Savalimmiormiut ilinniartortaat amerlasuut ilaajumallutik nalunaartiterput, kalaallilli ilinniartut ilaajumasut amerlavallaanngillat.
Naapitsitsinermi Folketingimi naalakkersuisunilu ilaasortat oqalugiassapput, ilinniartitaanermut ministeri Bertel Haarder, Avatangiisinut ministeri Conni Hedegaard aamma Socialdemokratit siulittaasuat Helle Thorning Schmidt.
Kalaallit Danmarkimi ilinniartut Savalimmiuneersunut naleqqiullutik politikkimik soqutigisaqarnerat annikinnerusutut isikkoqartoq tamatumunngalu Savalimmiormiut Danmarkimi ilinniartut kalaallinut naleqqiullutik amerlanerujussuunerat peqquteqarsinnaasoq Atlantikup avannaani qinikkat suleqatigiiffianit oqatigineqarpoq. Savalimmiormiut Danmarkimi ilinniartut 3000-iupput kalaallillu 392-llutik.
Kalaallit ilinniagaqartut naapitsitsinermut ilaaniartut ikinnerat uggornartuusoq Atlantikup Avannaani Suleqatigiinni allatsi Mininnguaq Kleist oqarpoq:
- Uggornarpoq kalaallit allatsissimasut ikinnerat. Kalaallimmi ilinniarluarsimasut nunatsinni politikkimik soqutigisaqarlualernissaat
pingaaruteqarpoq, ilinniarsimasut nunatsinni pissutsinut ilisimasaqarluartut iluaqutigisussaassagatsigit. ilinniarluarsimasut peqataasalerpallu nunatsinni politikkikkut ingerlariaaseq qaaffariassagami.
DKIK-p siulittaasua Parnuna Egede oqarpoq naapitsitsinermut kalaallit ilinniartut ikittuinnaat ilaaniarnerat ilinnigassanik pingaartitsinermik peqquteqarnerugunartoq. Atlantikup Avannaani Suleqatigiit ilinniartunut Christiansborgemi napitsitsissaaq marsip ulluisa 31-anni.
