Kalaallit ilinniarluarsimasut angerlarnissat neriuutigaat
Folketingimi Atlantikup Avannaani Suleqatigiit kalaallit Danmarkimi najugaqartut pillugit misissueqqammerput, tassanilu paasineqarpoq, kalaallit 18.563-nngorsimasut.
Folketingimi ilaasortaq Kuupik Kleist KNR-imut oqarpoq, apeqqutit pingaartut pingasut Danmarks Statistik suleqatigalugu misissuinerminni paaserusussimagitik.
Misissuineup siullermik takutippaa, kalaallit savalimmiullu ilinniagartoorpassuit sulisut, taamaalillutillu Danmarkimi aningaasarsiornermut inuiaqatigiinnullu iluaqutaallutik.
- Aamma soqutiginarpoq paasissallugu, ilinniareernerminni sooq nunatsinnut uterneq ajornersut, tassami ilarpassui Nunatsinniit ilinnigaqarnersiuteqartarmata?
Taavalu aamma inuit Nunatsinnut attuumassuteqartut uternissaminnut qanoq ililluta soqutiginnilersissinnaanerlugit paaserusukkatsigu.
Tassa Folketingimi Atlantikup Avannaani Suleqatigiit neriuutigaat, nakorsat ilinniartitsisullu kalaallit Danmarkimiittut Nunatsinnut utissasut.
- Aap, kisianni aamma oqarpugut, inuit sumi nunassikkusunnersut uagut akuliuffigisinnaanngikkipput. Kisianni paaserusupparput, Nunatsinniilissagunik sulilerlutillu, taava sunik naatsorsuutigisaqarnersut, Kuupik Kleist oqarpoq.
Taanna oqarpoq, misissuinikkut kalaallit ilinniarsimasut nunatsinnut utinngitsoorsimasut ilinniagaqarnersiutaannik utertsitsiniarnissaq siunertaanngitsoq.
