Kalaallit Ilinniagaqartut Kattuffiat ilinniartumit uparuartorneqarpoq
Kalaallit Ilinniagaqartut kattuffat KIK-mik naalisarneqartartup, Kalaallit Nunaat tamakkerlugu katillugit 311-nik ilaasortaqartoq.
KIK-mi Ilaasortaasimasoq Qaqortumi GU-mi ilinniartoq Jesper Schrødir, isumaqarpoq KIK-mut ilaasortaaneq asuli aningaasanik maangaanartitsinerusoq, kiisalu KIK ersarinngippallaarnerarlugu.
- KIK ersarinnerusariaqaraluarpoq, suliaminillu takutitsinerusariaqaraluarluni. KIK attaveqarfiginissaa ajornannginnerusariaqaraluarpoq. KIK takutittariaqarluarpaa ilinniartut kaffugigaat, Jesper Schrødir oqarpoq.
Nangillunilu.
- KIK attaveqarfiginiarnikuugaluarpara elevrådimi suliaqarnerput pissutigalugu. Kisiat KIK nittartagaqanngilaq kiisalu oqarasuaataat matoqqalluni. Misigisimavunga qaammammut 50 kr. KIK-mut akiliutigisartagarisimasaga asuli eqqaavimmut igiinartarsimallugit, Jesper Schrødir oqarpoq.
Kalaallit Ilinniagaqartut Kattuffianni siulittaasoq Tola Rosing Carlsen-ip oqaatigaa sapinngisaq tamaat ilinniartut saaffiginnikkaangata ikiorniartarlugit. Paasisinnaanerarpaali Jesper Schrødir oqarmat KIK ersarinngippallaartoq.
- Tupiginngilara KIK ersarinngippallaarpat. KIK aningaasatigut ajornartorsiuteqarpoq, tamannalu KIK ersarinngippallaarneranut pisooqataalluni. Kisiat sullissineq ingerlaanarpoq, KIK-mut saaffiginnittoqaraangat saaffiginnittut sullinneqartarput, Kalaallit Ilinniagaqartut Kattuffianni siulittaasoq Tola Rosing Carlsen taamak oqarpoq.
KIK ullumikkut ullup affaanik sulisumik allaffimmioqarput, nittartagarlu ammaqqinneqarsimanani suliassatut pingaarnertut isigineqanngimmat ammaqqinneqarsimanani.
KIK ukiumut 200.000 koruunit missaannik ilaasortat akiliutaannit isertitsisarpoq, Namminersornerullutik Oqartussaniillu ukiumut 25.000 koruuninik tapiiffigitittarluni. Taamatullu Tipserluni Lottorlunilu eqquiniaasitsinermit isertitanik aningaasanik qinnuteqarsinnaallutik.
