Kalaallit ilaasortaatitaat danskit aningaasanut inatsisissaannik akuerseqataassaapput

- Aap, akuerseqaataasinnaanngorpasippugut, Johan Lund Olsen taama oqarpoq.

IA-mut pingaaruteqarnerpaasoq tassaavoq Nunatsinni eqqartuussiveqarnermi suliassanik qaleriiaatiinnalersimasunik immikkut suliaqartussanut aningaasaqarnermut ministerip 20 mio. koruuninik immikkoortitsiniarluni neriorsuuteqarsimanera. Peqatigisaanillu danskit naalakkersuisui neriorsuisimapput Danmarkimi isumaginninnikkut suliniutit matoqqajaasut ataavartumik aningaasalersorneqarnissaannut aaqqiissutissanik nassaarniassallutik.

- Taakku qulakkeerneqartutut oqaatigineqarsinnaapput. Danskit aningaasaqarnermut ministeriat ukiaq allagaqarluni kalaallit isumaginninnikkut ikiortariallit sullinneqarnerinut ataavartumik aningaasaliissuteqartarnissaq sulissutiginiarlugu neriorsuutigaa, akisussaaffillu taanna qimarratigisinmnaanngilaa.

Inuit Ataqatigiilli aningaasanut inatsisissatut siunnersuummut itigartitsiniarlutik nalunaaruteqarmata immikkoortut aaqqittariaqarsorisaat allat aammna pineqarput, taakkulu Sara Olsvigip malersoqqinniarai, Johan Lund Olsenip oqaatigaa, taannami Folketingimi sulinermini ullumi naggataarpoq, Sara Olsvigip sulinngiffeqarnera tamaanga killeqarmat Folketingimullu uteqqittussanngorluni.

- Soorunami suliassat allat aamma malersortussaassavai. Eqqartuussiveqarnerummi pinerluuteqarsimasunillu isumaginnittoqarfiup iluani suli annertuunik aaqqinniagassaqarpoq.

Siumup folketingimut ilaasortaatitaa Doris Jakobsen, aningaasanut inatsisissatut siunnersuutip siullermeerneqarnerani akuerseqataaniarluni oqaatigereersimavaa, peqatigisaanilli aamma IA peqatigalugu eqqatuussivieqarnermut tunngatillugu isumaginninnikkullu suliniutinut aningaasaliissutit ataavartunngortinneqarnissaannik ilungersuuteqarsimalluni.