Kalaallit ikiortariallit sullinneqarnissaat pillugu periusissaq aallartisarneqarpoq
Kalaallit ikiortariallit Danmarkimi pitsaanerusumik inuuneqalernissaat qulakkeerniarlugu aningaasanik amerlanngikkaluartunik immikkoortitsisoqarnera pitsaasuuvoq, annerusumilli suliniuteqartoqarsinnaavoq, aamma ukiut tamaasa aningaasarsiortoqarunnaarnissaa angunuarlugu aningaasanut inatsimmi aningaasanik immikkoortitsisoqarsinnaavoq.
-Immikkut ikiortariallit pillugit periusissakkut aningaasanik immikkoortitsisoqarneratigut suliniutaasut pioreersut pitsaanerusumik ataqatigiissarneqassapput, ikiortissaaruttoqannginnissaa qulakkeerniarlugu. Suliniutaasulli pioreersut ilarpassui ukiup naanerani matusussanngoqqapput. Suliniutit Kalaallit Illuutaannit ingerlanneqartut ukiumut 4 mio. kr.-inik aningaasartuuteqarfiusarput. Peqatigisaanillu nuna tamakkerlugu suliniuteqarnermi kalaallit Danmarkimi affaannaannut naammapput. Trekantsområdemik taaneqartoq aamma immikkut ikiortarialinnut periusissamut ilanngunneqarsimasinnaagaluarpoq, kisianni aamma Damarkimi kommunini tamangajanni kalaallinik ikiortariaqartunik najugaqartoqarpoq, Doris Jakobsen, Siumut sinnerlugu Folketingimut ilaasortaasoq nassuiaavoq.
Danmarkimi kommunini amerlasuuni kalaallinik ikiortariaqartunik kommunimut nuuttoqarneranut atatillugu qanoq iliortoqarnissaanut tunaartarisassaqanngillat.
-Kommunit ilaat suliniuteqarnissamut pisariaqartitsinerup allanngorarneranik atugaqarfiupput. Ukiut ilaanni kommunimut nuuttut amerlaneruni pissutigalugit immikkut ittumik suliniuteqarnissamik pisariaqartitsisoqarpat, taava kommuni suliniummut tapiiffigineqarsinnaasariaqaraluarpoq. Danmarkimi kommunit aningaasatigut ajornartorsiorfioreerput immikkullu suliniteqarnissaq sipaarniarfigeratarsinnaagaat, Doris Jakobsenip aarleqqutigaa.