Kalaallit ikinnerpaamik arfineq pingasunik ujamminnakkusupput
Kalaallit ukiormanna Island Gameseqarnissaanni peqataaffigissavaat arsaanneq, sulorarneq, nerrivimmi arsaararneq, volleyball aamma atletik.
Kalaallit Island Gamesimi peqataasussat unnuaq Isle of Wight-imut apuupput tassanilu unammersuarnerit ingerlanneqartussaapput. Maanna ammaanersiornissaq unammisaqattaarnissallu utaqqisaaginnalerput.
- Kingullermik Island Gameseqarmat arfineq pingasunik ujaminnappugut siulersuisuniillu siunnerfiuvoq ikinnerpaamik taakku amerlaqataannik pissarsinissarput, timersoqatigiit kattuffianni siulittaasoq Nuka Kleemann KNRimut oqarpoq.
Isumalluarfiginertut taaneqarput sulorartartut kingullermik Island Games-eqarmat kalaallit ujaminnattaavinit arfineq pingasuusunik arfinilinnik pissarsisut. Aammattaaq nerrivimmi arsaarartartut holdikkaarnermi bronzennapput kiisalu volleyballimi angutit bronzennallutik.
Ammaanersiorneq arfininngornermi unnukkut pissaaq unammersuarnerillu aallartivissallutik sapaammi. KNR radio unammersuarnissanut qilanaartuummik unnugu nalunaaqutaq 18.00 aallakaatitsissamaarpoq.
