Kalaallit iikkani titartagaat Danmarkimi saqqummersinneqartut
Saqqummersitsineq Subkult 2012-imik qulequtalimmi nunani avannarlerni tamani eqqumiitsuliat naliginnaasuunngitsut saqqummersinneqarnerini kalaallit iikkani allataat titartagaasalu assilineqarneri ilaatinneqartussanngorput.
Tamakkulumi Nunatsinni majuartarfeqarfinni iikkanilu takussaaqaat.
Ilaatigut biilit nal. Akunneranut 40 kilometerinik sukkassuseqarnissaanik allagartaq 0-italerneqarnera, tassa 400 kilometerinngortitanik assilisat kiisalu peqatigiiaat ilisarnaataat, soorlu ’96 boys nuan’ assilineqarnerisa saniatigut nunatsinni ulluinnarni politikkimut tunngasunik oqariartuuteeqqat ilaapputtaaq.
Naggueqatigiit pillugit ilisimatusartup-tassa etnologip Jakub Christensenip Kalaallit Nunaanni iikkani titartakkanik eqqumiitsulianillu inuusuttuaqqat pilersitsisarneri ukiuni arlaqartuni malinnaavigiuarsimavai assilisarsimallugillu.
Aaqqissuussineq Subkult 2012-imik qulequtalik sapaatip akunnera ataaseq ingerlanneqalermat eqqumiitsuliortoq, Tuukkaq Teaterimilu isiginnaartitsisartutut ilinniarsimasoq Jessie Kleemann eqqumiilluinnartumik performanceart-imik taagorneqartartumik isiginnaartitsissaaq, nunatsinnilu kultooritoqatsinniit nutaaliaanerpaanik akoorilluni takutitsissalluni.
Tassa nunatsinni iikkami majuartarfinnilu titartakkat eqqumiivissunillu eqqumiitsuliortut Hjortespring Biblioketimi misigisassat ilaaginnassavaat.
Nunanimi avannarlerni eqqumiivissortunik nipilersortartartut eqqumiilluinnartunilu nerisassiat misigisassaanerisa saniatigut, piumagaanni sauna-riartoqarsinnaassaaq. Sauna-rtarnermi Finlandimiut inooriaasiannut akuulluinnartuummat misigisassat imaannaanngitsutut nalilerneqarluni misigisassanut taputartuunneqarsimavoq.
Taamaammat novembarimi Danmark-iliassagaluaruit Hjortespring Bibliotek-ilu aqqusaarsinnaassagukku allarummik eqqaamalaarniarina, eqqumiitsunillu misigisaqarlutik. Aamma Nunatsinni iikkani majuarartarfeqarfinnilu allatat eqqumiitsuliallu Jakub Christiansen-ip assilisimasai internettimut attaveqaruit linki ataaniittoq iserfigalugu isiginnaarsinnaavatit.
