Kalaallit ICC-mi siulittaasuutitaqarnerat naammassilerpoq
ICC-p ataatsimeersuarnissaa Canadami Northwest Territoriami Inuvimmi juulip naalernerani pisussaq piareersarneqarpoq. Tassungalu peqatigitillugu kalaallit siulittaasuutitaqarnerat Canadami naggueqatitsinnut tunniunneqassaaq.
ICC-p præsidentiata Aqqaluk Lyngep KNR-imut oqaatigaa, Naalakkersuisut ICC-mut tapiissutinik siorna ikilisaanerat kattuffiup siunissami sulinissaminik pilersaarusiornissaanut ajornarnerulersitsisoq.
- Taamaammat aamma tapiissutinik ikilisaanerit ICC-mut ilaasortat allat Canadameersut Alaskameersullu isumakuluutigaat. Maanna inissisimanerput aningaasaliinissamullu periarfissanik allanik ujarlernissaq pillugu qaammammi uani kingusinnerusukkut ataatsimeeqatigeeqqinniarluta aalajangerpugut, Aqqaluk Lynge oqarpoq.
- Maannakkut inissisimanitta siunissamut naggueqatigiillu Inuit suleqatigiinnerisa ingerlateqqinnissaanut ernumalersippaatigut, Aqqaluk Lynge oqarpoq.