Kalaallit Herstedvesterimi parnaarussat nunatsinnukanngitsoortarput

Kalaallit Herstedvesterimi parnaarussat Kalaallit Nunaannut tikeraarnissaat taamaatiinnartariaqartarpoq, nunatsinni isertitsiviit ulikkaaqqaneri pissutigalugit.

Parnaarussap nunatsinnut tikeraarnissani ukioq affaq sioqqullugu paasisarpaa.

Herstedvesterimili parnaarussivik nunatsinniit ulloq ataaseq marlulluunniit sioqqullugu piffissaq kingulleq ilisimatinneqarsinnaasarpoq, Kalaallit Nunaanni isertitsivik ulikkaaqqammat tikeraartoqarsinnaanatik.

Parnaarussivimmi Herstedvesterimi parnaarussat kalaallit ukiut kingullit nunatsinnut tikeraarsinnaanerat atuuppoq. Tassani anguniarneqarpoq nunatsinni ilaqutaasut ikinngutaasullu attavigiinnarnissaat.

- Ukiulli kingulliit marluk ingammik Tunumiit parnaarussat nunaminnut tikeraarsinnaasimanngillat, tamanna peqquteqarpoq nunatsinni unnuisarfiit ulikkaaqqammata.

- Parnaarussamut sivisuumik qilanaarsimasumut tamanna soorunami nikallornermik kinguneqartarpoq, taannaanngitsoq eqqorneqartarpoq, aamma nunatsinniittut ilaqutaasut, maanilu sulisuusut angalanissamut piareersarsimasut, taama oqarpoq Karsten Madsen Herstedvesterimi kalaallit parnaarunneqarfianni immikkoortortami ittuusoq.

- Ukiut kingulliit marluk Tunumut aallartitsiniartaraluarpugut, piffissarli kingullerpaaq atorlugu ilisimatinneqartarluta tikeraartoqarsinnaanngitsoq - unnuisarfiit ulikkaaqqaneri pissutigalugit, Karsten Madsen raadiuaviisimut oqarpoq.

Parnaarussap angalanissani ukioq affaq sioqqullugu akuersissutigineqartoq paasisarpaa, piffissarli kingulleq atorlugu annaallugu aamma paasisarlugu. Tassa angalanissaraluaq immaqa ukiorpassuit utaqqisimasaq - ullut marluk sioqqullugu tamaat annaaneqartarpoq.

- Ajornartorsiut ilisimaneqareersoq aaqqissutissaanik nassaartoqartariaqarpoq, assersuutigalugu parnaarussaq angalaqataalu allamut unnuisarfiup avataanut inissinnerisigut, Karsten Madsen oqarpoq.