Kalaallit Haderslevimi peqatigiiffittaartut
Peqatigiiffittaami maajip aappaani ataatsimeersuartoqarpoq, peqatigiiffillu atserneqarpoq 'Qajaasat kalaallit Haderslevimi'. Kikkunnulluunniit Kalaallit Nunaannut attuumassuteqartunut ammavoq, siulersuisunngortut tusagassiorfinnut nalunaaruteqarlutik taama allapput.
Pilersitsiviusumik ataatsimeersuarnermi inuit 16-it takkupput.
Peqatigiiffittaaq ilaatigut juunip 21-ani Inuiattut Ullorsiornitsinnut atatillugu aaqqiissuussaqassamaarpoq.
- Nallittorsiutigissavarput, illoqarfiullu qeqqani tamanna pissaaq. Kingusinnerusukkut paasissutisseeqqissaagut, siulersuisut taama allapput.
Siulersuisunngortut tassaapput, siulittaasoq Ava Hørlyk, aningaaserisoq Nis Christian Raun kiisalu siulersuisuni ilaasortat allat pingasut: Henning Ohlsen, Kristian Marcussen aamma Julie Johnsen.
Siulersuisut kingusinnerusukkut siulittaasup tullianik allatsimillu toqqaallutik inissitertussaapput. Sinniisussatut toqqarneqarput Marie Stender aamma Emma Marcussen. Kukkunersiuisussatut Johannes Peglau toqqarneqarpoq Kurt Hørlyk sinniisussaralugu.