Kalaallit frimærkii nutaamik nittartagaqalerput
POST Greenland-ip immikkoortortaani Filatelia-mi Tasiilamiittumi nittartagaq nutaaq sisamanngormat atoqqaartinneqarpoq.
Frimærket nunarsuaq tamakkerlugu soqutigineqaqaat, neriuutigineqarporlu, frimærkit suli amerlanerusut nittartagaq atorlugu tunineqarsinnaalissasut. Nunarsuarmi inuit 15.000-it missaanniittut kalallit frimærkiinik nutaanik pisartagaqarput – amerlassusiilu ukiuni kingulliunerusuni taamaaginnangajassimallutik.
Frimærkinik katersisartut ukiui agguaqatigiissikkaanni paasinarpoq, utoqqaliartuinnartut. Taamaattumik filateliamit neriuutigineqarpoq, nittartagaq atorlugu nunarsuarmi inuusuttut aamma soqutiginninnerulersinneqarsinnaalissasut. Filateliap qitiusumik allaffeqarfiani Tasiilamiittumi tuniniaanermut pisortaq Søren Nikolaj Korshøj nassuiaavoq.
- Meeqqanut inuusuttunullu klubbimik ungasinngitsukkut pilersitsisinnaanissarput neriuutigaarput, nittartakkamilu oqaatsit danskisut, tuluttut tyskisullu maanna atorneqarsinnaallutik. Nunat skandinaviamiittut saniatigut Tyskland tuniniaaviunerpaavoq. Søren Nikolaj Korshøj oqarpoq.
Nittartagaq uani takuneqarsinnaavoq: www.stamps.gl
