Kalaallit filmiliorsinnaasut salliutikkusunneqarput

oktobarip 03-at 2006 16:15

Nunatsinni filmiliornermut aningaasat atorneqartartut ukiumut 2 mio. koruuninut aaqqinneqarnissaat Inatsisartut ualimut ataatsimiinneranni Inuit ataqatigiinniit Olga Poulsen Berthelsenip siunnersuutigaa.

- Piffissami sivisungaatsiartumi filmiliortarnermut tunngassuteqartunik gruppitsinni eqqartuisarpugut, tamannalu tunngavigalugu taamaattunik suliaqartartunik oqaloqateqartarpugut. Aalajangiupparpullu pisariaqartoq taamatut filmiliortarnermut aningaasatigut periarfissaritinneqartut qaffaavigitinneqarnissaat, Olga Poulsen Berthelsen oqarpoq.

Aperaarput filmit kalaallinit suliarineqarsimasut ornigisimaneraat.

- Filmiliat Kalaallit Nunaanninngaanneersut uagut pingaartitaraagut. Imaanngilaq nunani allaniit filmiliornissat inerteqqutigigivut, nunatsinniliuna filmiliornermik suliaqarsinnaasut pigisavut atorluarneqarnissaat pingaartikkipput, Olga P. Berthelsen oqarpoq.

Taanna erseqqissaavoq kalaallit filmiliortartut filmiliornissamut periarfissinneqassagunik periarfissaat aamma annertunerusariaqartut.

- Massakkut naalakkersuisooqatigiit iliuuseqarput kulturi pillugu siunnersuisooqatigiinnut tamatuma suliassanngortinneqarneranik, taakku siunnersuusiorfigissavaat qanoq annertutigisumik aningaasaliisoqartigisinnaanera. Taamaammallu 2008-mi siunnersuutinik tigussaasunik erseqqissunillu naalakkersuisuniit saqqummiussisoqartussaavoq, kultureqarnermi naalakkersuisoq Doris Jakobsen oqarpoq.