Kalaallit filmiliaat nersornaaserneqartoq

Filmiliortartut, takornariaqarnermut siunnersuisoqatigiit suliniaqatigiiffiillu 370-t Deauville Green Awardsimi Parisimi pisumi sapaatip akunnerata siuliani katersuupput. 

Tassani filmiliortartup Ulannaq Ingemannip filmiliaa “Explorers by Nature: Life of Sheep Farmers” (Kalaallisut: Inunnguutsimik alapernaanneq: Savaatilittut inuuneq) ajugaaniuttuni arfiniliusuni ilaavoq.

Filmi naatsukullaliaq Visit Greenlandimit, filmiliami ingerlatsisuusumit, saqqummiunneqarpoq. 

Filmi immikkuullarissoq

Filmit tallimat allat ajugaaniutivinnermi ilaasut nunat TV-qarfissuinit suliarineqarsimapput. Taamaakkaluartoq kalaallit filmiliaat, pinngortitamut pissaaneqaqisumut kalaallinullu attuumassuteqartoq, apeqquserneqarsinnaanngitsumik ajugaavoq. 

Filmi Nunatta kujataani assilisaasoq nipilersoqatigiinnit Sleeping At Last-ikkunnit nipilersuutitalerneqarsimasoq isiginnaartunik tiguaasimasoq Visit Greenland tusagassiuutinut nalunaaruteqarpoq. 

- Nersornaaserneqarnikkut suliarput, minnerunngitsumillu filmiliortartup Ulannaq Ingemannip piginnaasaanik, nersorinninneruvoq. Filmiliaq immikkuullarissuuvoq, isigiuminaannarani misigissutsinik attuigami, Visit Greenlandimi pisortaagallartoq Anders La Cour Vahl oqarpoq.

Unammillertit aningaasaateqarluarput takisuuliorlutillu oqaluttualiorlutik, taamaammat Visit Greenlandip Deauville Green Awards peqataaniarluni nalunaarnera kinguneqarluarnissaa qularineqarsinnaagaluarpoq. Taamaattoq “Explorers by Nature: Life of Sheep Farmers” ajugaavoq. 

- Filmiliap immikkuullarissumik suliaanera isiginnaartut qisuariaateqarfigaat, Visit Greenland allappoq. 

Filmi “Explorers by Nature: Life of Sheep Farmers” uani takuuk.