Kalaallit filmiliaat marluk ataatsimeersuarnermi takuteqqaarneqassapput

Silap pissusaata allanngornera pillugu filmit piviusulersaarutit kalaallinit filmiliarineqartut marluk, Københavnimi ataatsimeersuartoqarneranut atatillugu takuteqqaarneqassapput.
novembarip 23-at 2009 05:12

Piviusulersaarutit taaguuteqarput "Nuna Qorsuk" aamma "Marloriaammik Sunniut". Tamarmik minutsinik 25-nik sivisussuseqarput, taakku Nunatsinni inuusuttut silap pissusaata allanngorneranut isumaannik sammisaqarput.

Piviusulersaarummi siullermi, inuusuit tallimat Kujataani najugallit silap pissusaata allanngornera, meeraaneranniit ullumimut qanoq malussarfigisimaneraat sammineqarpoq. Piviusulersaarutip aappaani inuusuit sisamat Nunatta Qeqqani najugallit, sulinerminni silap pissusaata allanngornera assigiinngeqisumik sammivaat.

Filmit piviusulersaarutit taakku Aka Hansen ilitsersuisoralugu Malik Kleistilu kusanaqisunik assiliisoralugu, Tumit Productionimit suliarineqarput. Nunani Avannarlerni ilisimatusarnermik suliaqartut aningaasaliisoralugit seniorforsker Rasmus Ole Rasmussen aqutsisoralugu piviusulersaarusiat piviusunngortinneqarput.

Filmit COP15-imi decembarip arfineq-aappaanni arfineq-pingajuannilu takutinneqaqqaarnerisa saniatigut Københavnimi Kalaallit Illuutaanni Århusimilu Kalaallit Illuanni decembarip qulingiluaanni qulingannilu aamma takutinneqassapput, kiisalu Illu Atlantikumi saqqummersitsinermi decembarip 14-ianni 15-iannilu aamma takutinneqarumaarlutik.

Filmiliortut Tumit Productionimeersut filmertarfinni ilaqutariinnut juullimi isiginnaagassamik aamma filmiliaqarput, taaguutilimmik "Hinnarik sinnattunilu", taanna Kulturikkut Illorsuarmi Katuami decembarip 25-aniit decembarip 30-ata tungaanut takutinneqartassaaq.