Kalaallit filmiliaat amerlaqisut Berlinimi isiginnaarneqarsinnaassapput

Filmfestival nunanit tamanit peqataaffigineqartoq, Greenland Eyes, Tysklandimi Berlinimi ullumimiit ammarneqarpoq.

Filmit katillugit 18-it Berlinip illoqarfiata qeqqani filmertarfissuarmi Arsenalimi sapaatip-akunnerani tulliuttumi takutinneqassapput.

Knud Rasmussenip filmiliaa "Pâlop Nuliarsarnera", filmi nipeqanngitsoq, Asta Nielsenip pingaarnertut inuttaaffisaa, "Eskimo Baby" allagartarsuarni pilerisaarutigineqartunut ilaapput.

Filmit amerlanersaat filmiliaapput takinngitsut, soorlu Uusaqqak Qujaukitsup filmiliaa, "Aulahuliat", Nunatta Kitaata avannaata avataani pernaammik takutinneqartussaq.

Filmit nutaanerit allat nunatsinneersut aamma takutinneqassapput, soorlu: Qaqqat Alanngui, Nuummioq, Inuk aamma Hinnarik Sinnattunilu. Filmit nunatsinneersut aatsaat taama amerlatigisut ataatsikkut takutinneqassapput.

Filmi aliikkutassiaq Tikeq, Qiterleq, Mikileraq, Eqeqqoq, - filmi Nuummioq sioqqullugu filmiliaasoq, Kalaallit Nunaata avataani aatsaat aamma takutinneqassaaq. Taanna kalaallit filmiliaanni siullersaavoq.

Festivaleqartitsinissamut aallarniisuuvoq filmiliortartoq affarmik kalaaleq, Ivalo Frank, Berlinimi najugaqartoq.