Kalaallit filmiliaannik takutitseqattaartarneq annertusiartorpoq

Filminik Kalaallit Nunaanneersunik takutitseqattaarnerit annersaat Tysklandip illoqarfiisa pingaarnersaanni Berlinimi aappaagu apriilimi pissaaq.
Allattoq Gedion Storch
aggustip 23-at 2011 10:18

Takutitseqattaarneq taaguuserneqarsimasoq Greenland Eyes International Film Festival isiginnaariartarfimmi Berlinimilu filmertarfiit tutsuiginarnersaanni, Arsenalimi nunarsuami festivalit annersaasa ilaanni Berlinalenimik taaneqartartumi pissaaq.

Kalaallit filmiliaasa siuarsarneqarnissaannut suliniuteqartuuvoq, kalaaleq/danskeq ilitsersuisartoq Ivalo Frank, nammineq Berlinimi ukiorpaalunni najugaqarsimasoq, qanittukkullu piviusumi tunngaveqarluni filmiliamini Echoes pillugu nunat tamalaat akornanni akissarsisinneqarsimasoq.

Festivaleqartitsineq illoqarfimmi Humboldt Universitet suleqatigalugu aaqqissuuneqarpoq, eqqarsaataavorlu filminik Kalaallit Nunaanni suliarineqarsimasunik imaluunniit Kalaallit Nunaannik samminnittunik arlalinnik takutitaqarnissaq.

Kalaallit filmiliaasa saniatigut aamma takutinneqassapput filmit nunanit allamiunit suliarineqarsimasut Kalaallit Nunaanni immiussat, ilaatigut filmi SOS Iceberg, arnamik tyskiusumik isumaqatigineqakkajunngitsuusumik, Leni Riefenstahlimik pingaarnertut inuttaqartoq takutinneqassalluni.

Aammattaaq kikkulluunniit nipilersortuniit naatsuaqqamik fillimiortartut imminut attaveqaqqullugit Ivalo Frank kaammaattuuteqarpoq, taamaalillutik Berlinimi filminik soqutigisaqartut Kalaallit Nunaat aamma filmiliortarfiusoq amerlanerpaat paasiniassammassuk.