Kalaallit eqqumiitsuliortut Boliviamiinnerat
Eqqumiitsuliortortavut assigiinngitsut kulturikkut paarlaasseqatiinnissaq pillugu ulluni kingullerni Boliviamiipput, ilaatigut Boliviami præsedentimut qinigaarlaaq Evo Morales naapippaat.
Henriette Rasmussen peqataasut ilagaat, taanna aperaarput, Boliviamiut Kalaallit Nunaanut tunngasunik ilisimasaqarluareernersut.
- Naami ilisimasaqanngitsupilussuupput, tupaallattupilussuupput kikkuunersugut naapilluta. Aamma nipaattuaraannginnatta, eqqumiitsuliortut pikkorissupilussuit Rasmus Lyberthikkut erinarsoraangamik tupigusutitserujussuartarput. Qaaqqusaavugut toqqaannartumillu Bolivia tamakkerlugu TV-kkut aallakaatinneqarluta unnukkut aqqanerniit unnuaqeqqata tungaanut 1 timersuaq. Oqalutsinneqarluta, ilisaritinneqarluta, eqqumiitsuliat takutinneqarlutik. Ramus Lyberth Karina Møllerilu TV-kkut erinarsortinneqarlutik, Henriette Rasmussen oqarpoq.
Taanna aperaarput sooq Boliviarpiaq taamatut angalaffigissallugu toqqarneqarsimanersoq.
- Suliaq taanna ukiut arlallit ingerlasimavoq, immaqa Katuap annertunerusumik akisinnaanerussavaa, aammalu eqqumiitsuliortut peqataasut namminneq akisinnaanerussavaat. Kisiannili oqartariaqarpugut Bolivia Danmarkip nunatut ineriartortutut ikiugaasa ilagivaat, taamaattumik eqqarsaat taanna ungasippallaarsimanngilaq kalaallit Boliviamiullu imminnut naapitissallugit soqutiginarsimammat, Henriette Rasmussen oqarpoq.
Henriette Rasmussenip Bolivia nunatsinnut assersuullugu oqarpoq, nunatsinni namminersornerulernerup eqqunneqarneranut Boliviap namminersulersimanera eqqaanarsinnaasoq sulili annertuneruinnarluni. Taamatuttaaq oqaluttuaraa, Boliviami præsedentinngorlaaq Evo Morales nunatsinni naalakkersuisut siulittaasuannit nassiussarsiani aaqanngitsoq puisip amianik sanaaq inuttaata naammagilluinnaraa.
- Soqutigisorujussuuaat nunatsinni marluinnik oqaaseqarluni ilinniartitaaneq, aammalu nunat inoqqaavisa pisinnaatitaaffii nunat tamalaat akornanni uagut kalaallit misilittagarilersimasagut kiisalu aamma namminersornerulluni oqartussaaneq tamakkua soqutigisorujussuuaat. Aamma namminersornerullutik oqartussaanermi inatsit tunniupparput præsedentitaamut. Kiisalu aamma uagutsinnut soqutiginarluinnartoq tassaavoq Boliviamiut massakkut inatsit tunngaviusoq nammineertoq suliarimmassuk, nunatsinni taamaattoqanngilagut aamma namminersorneruleraluarattali. Inatsit tunngaviusoq amigaatigivarput tamanna malittarissallugu soqutiginartupilussuuvoq aamma nunatsinni isumaliutigissallugu, Henriette Rasmussen ilaminit siulliulluni Københavnimut anngussimasoq taama oqarpoq, taassuma aamma oqaatigaa Boliviamiut nunatsinnut aamma tikeraarumaartut.
