Kalaallit eqqumiitsuliaat containerimik Helsingforsimut angallanneqartut
Containerimik Helsingborgimut angalaqataapputtaaq Nunani avannarlerni attaveqaatip (NAPA) pisortaa Leise Johnsen Nuummilu eqqumiitsuliortunngorniat ilinniarfianni ilinniartut sisamat, tassanilu kalaallit eqqumiitsuliaannik saqqummiusseqataassallutik.
-Inuiaqatigiit nutaaliaasuunerput takutissavarput, aamma takutissavarput nutaaliaasuugaluarluta nunatta itsaq kulturia suli tamakkiisumik ataqqineqartoq. Kalaallit containerianni eqqumiitsulianik suliaqaqataavunga, eqqumiitsuliatigullu nunami maani ukiuni kingullerni 100-ni ineriartorsimanerput takutikkusupparput. Qajartornermit angallatinut motoorilinnut, apummik illuikkianit illorsuarnut, Nakannguaq Mathiesen, eqqumiitsuliortunngorniat angalaqataasut sisamat ilaat oqaluttuarpoq.
”Nunat avannarliit angallavigalugit – sikup sinaavanit eqqumiitsuliat” Helsingforsimi akimarpaluissortumut inissinneqarsimavoq. Containerit inatsisartoqarfiup saavanut Glaspaladspladsimut inissinneqarsimapput. Helsingforsimi innuttaasut kalaallit, savalimmiormiut, Ålandip qeqertarmiuisa Islandimiullu eqqumiitsuliaannik alakkarterisinnaapput.
-Helsingforsilialerutta kalaallisuussamaarpunga, tikikkutalu kalaallisuut qanoq suliarineqartarneri pillugit nassuiaassamaarlunga. Puisip pisarineqarneranit, mersorneranut inerlugulu suliarineranut. Qalipaatit pillugit taakkulu isumaannik nassuiaanissaq annertussaaq, Finlandiulli tamatuma oqaluttuassartaanik misigisaqarluarnissaat ilimagilluinnarpara, Nakannguaq Mathiesen knr.gl-imut oqaluttuarpoq.
