Kalaallit eqqumiitsuliaat akitsorterunneqalersut

Kalaallit eqqumiitsuliarpassui tupilaat, ukkusissamit qiperukkat, kiinarpaat, qalipakkallu Sjællandip Avannaani Hørsholmimi akitsorterussinikkut arfininngorpat tuniniarneqassapput. Nutaarsiassaqartitsivimmi Ritzauimi taama allaaserinnittoqarpoq.
Allattoq Elisa Isaksen
novembarip 13-at 2008 06:27

Tassa aterminik isertuussisup kalaallit eqqumiitsuliaat allanik asseqanngitsut katersukkani Akitsorterussisarfimmi tuniniarniarmagit.

Tuniniaaniartoq piffissani assigiinngitsuni nunatsinni najugaqartarsimavoq katersukkanilu hunnorujut arlaqartut 1950-imiit 2007-ip tungaanut katersorsimallugit.

Akitsorterussisarfik mianersorluni naliliivoq, kalaallit eqqumiitsuliaat taakkua 800.000 koruunit missaannik naleqassasut.

Taakkunannga akisunersaalluni Glob-ip qalipagaa taaguuteqartoq “Ella Ø-mi qaammatigik”, 25.000 koruuninik nalilerneqartoq.

Aamma akisunernut ilaapput, kiinarpaat marluk Illoqqortoormiuneersut 10.000 koruuninik naleqarnerarneqartut.

Akitsorterussisarfiup, nunanit allanit pisiniartorpassuarnik takkuttoqarnissaa ilimagaa, ilaatigut Canadameersunik, Tysklandimeersunik Frankrigimeersunillu.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq